Minister-in Bungkhawkai a tlawh

Commerce & Industries minister Dr R Lalthangliana chuan nimin khan Thingsai rama India leh Myanmar insumdawn tawnna tura buatsaih Bungkhawkai a tlawh a, hmalaknate enin, India leh Myanmar inkara Ṭiau luia lei dawh dan tur leh kawngpui siam dan turte a en a ni.

Dr R Lalthangliana hian nimin vêk khan MNF South Tuipui Block II-in Cherhlun community hall-a political training an buatsaih a hmanpui bawk a; thu sawiin, "Kan sorkar hmasaka district thar pathum kan puan tawh - Hnahthial, Saitual leh Khawzawlte chu Congress sorkarin kum 10 chhunga eng mah ti loa an liampui hnuah kum 2018-a kan sorkar tirh aṭanga thla riatnaah national flag pawt pharhin bul kan ṭan thei ta a ni," a ti.