LDLOA-in an phût a hlawhtlin loh chuan March 2020-ah 'stay order' pek leh an rél

Lawngtlai District Land Owners Association (LDLOA) hruaitute chu nimin khan Lawngtlai Bazar Venga an pisaah an ṭhukhawm a; Kaladan Multi Modal Transit Transport Project (KMMTTP) hnuaia Lawngtlai aṭanga Myanmar ram pawh tur kawngpui siam mekah thil phût thar neiin, chu chu tihhlawhtlin a nih loh chuan kumin March thla tir aṭangin kawngpui hna thawh mek chawlhsan tura hriattir leh an rél.

Lawngtlai aṭanga thu dawn danin, KMMTTP kawngpui sialin ram a tihchhiat neitu intél khawm, LDLOA hruaitute chuan, an ram tihchhiat a nih vanga zangnadawmna an dawn tur an hmuh ngei theih nan sorkar hmalakna ngaihchân zui phawt an rêl a ni. Chutih rualin, sorkarin detail project report (DPR) siam tawh a sût (cancel) chu hnuhkîr a nih loh chuan March 2020 aṭangin KMMTTP kawngpui siamtute chu an hna thawh chawlhsan tura hriattir leh ni se, an ti.

LDLOA hruaitute chuan, January 17, 2020 khan LADC Chief Executive Member hoin LADC-a Executive Secretary, Revenue Officer leh LDLOA hruaitute'n Mizoram sor­kara additional chief secretary Lalram Thanga an hmu a, zángnadawmna tihfel thuai an duh thu leh an hmalaknate an thlen tih an sawi.

KMMTTP kawngpui siamnaa zangna­dawmna pek tur hi a tìrah chuan ram a tih­chhiatsak nia insawi mi 1,024 an awm a, chuta ṭang chuan vawi eng emaw zat en­fiahna (joint verification) neiin thlitfìm a ni. LDLOA hruai­tute sawi danin, tun dinhmunah mi 303-te chu zangnadawmna la tura tihfel a ni a, an lâk zat tur nen ruahmanfel a nih hnuah sorkar­in a sût (cancel) a; cancel order chu hnuhkîr a nih a, zangnadawmna an hmuh theih nan chuan na zawka hmalak an rél ta a ni.

Ram neitu intél khawmte'n zangna­dawmna pek an phût vanga kawngpui siam hna thawktute an dan tawh zat chu belhkhawm­in ni 390 a tling tawh a; Janua­ry 14, 2020 pawh khan tiam chin awm loin hnathawktute an dang leh a, mahse, chumi ní vek chuan LDLOA hruaitu mi pasarih chu an president H Remmawia hoin police-in an man.

Kawng siamtute 'stay order' an pek chu sût lailâwk an remtih hnuah January 14 zanah police-te'n an chhuah zui a; LDLOA hruaitute chuan Aizawl­ah thuneitu sang zawkte an dâwr zui a ni.