R Lalzirliana'n Tuivawl lei a hawng

Minister R Lalzirliana chuan nimin khan Saitual leh Phullen inkara Tuivawl lui chunga lei (bailey bridge) siam thar a hawng. Lei hi cheng nuai 928 sénga dawh a ni.

R Lalzirliana chuan, Tuivawl lei chu kum 1992-a hman ṭan a nih thu sawiin, "A rei deuh tâk avangin a chak tâwk tawh lo a, Tuivawl ràla mipuite'n harsatna tam tak an tawh phah a ni. Motor ton 10 phur chin chauhin a zawh theih avangin lei thlen dawnah bungrua hlân thlaka hlân chhoh zel a ngai ṭhin. Thil phurh chhuah leh phurh luh kawngah mipuiin harsatna an tâwk ṭhin a, hei hi sorkar chuan a ngaimawh a, a hmalakna vawiinah a lo lang ta a ni," a ti.

Tuivawl lei hi NABARD scheme RIDF-XXII Project, 'Rural Roads & Bridges' aṭanga thawh a ni a, estimate chu cheng nuai 928 a ni. Cheng nuai 820.12 chu NABARD loan a ni a, cheng nuai 107.88 chu Mizoram sorkarin a tum thung. Lei dawh hna chu August 10, 2017-ah Sunshine Overseas Infra Pvt. Ltd.-in an thawk ṭan a, December 6, 2019-ah dawh zawh a ni.

Lei thar hi double lane, ft. 180-a sei, ft. 24.6-a zau a ni a, lirthei metric ton 70-a rit zawh theih tura dawh a ni.