NEDA ṭhutkhawmnaah CM Zoramthanga a tel
India hmarchhak biala political party hrang hrangte Bharatiya Janata Party (BJP) kaihhruaina hnuaia an intèlkhawmna, Northeast Democratics Alliance (NEDA) chu nimin khan Guwahati-ah BJP president Amit Shah, Union Home minister ni bawk hoin an ṭhukhawm a, chief minister Zoramthanga pawh a tel.
Meeting-ah hian Amit Shah, DoNER minister Dr Jitendra Singh, NEDA convener Himanta Biswa Sharma leh NEDA-a tel political party hrang hrang president-te'n thu an sawi a; CM Zoramthanga pawhin thu a sawi a ni.
MNF president Zoramthanga chuan, hmarchhak state-te Congress kaihhruai sorkarin an tihchhiat hun lai a awm nia sawiin, "Tunah chuan NDA-in min enkawl tawh. Hmarchhak hi Myanmar, Bangladesh leh China nen kan inrî a, chuvangin, dan phal loh tawlhrûkna atan hman a ni ṭhin a, kan fimkhur hle a ngai," a ti.
Dan loa sumdawnna kalkawnga India hmarchhak bial hman a nih lohna atan remna neih a ngaih thu sawiin MNF President chuan, "Central sorkar hian rambuai ber ni ṭhin, ram rálmuang ber ni ta Mizoram dinhmun zir chiang se, engah nge hmarchhak state dangah pawh remna hi a awm theih loh bik ang," a ti a; Mizoramah chuan rammu pakhat pawh an awm loh thu a sawi.
Zoramthanga chuan, dan loa sumdawnna dona atan hmasawnna hmarchhak state-te'n an mamawh tih sawiin, "Mipuite an retheih chuan a hlauhawm a, hausa turin kan siam tur a ni. Chumi atan chuan hmarchhak state-te'n ram zau tak kan nei a, Mizoram chuan tuna mipui lêt 3-4 châwm thei ram kan nei. Hmasawnna a thlenna atan hian Central sorkar hi kan pa leh min enkawltute an ni," a ti.
BJP president Amit Shah chuan, NEDA chu NDA-in grassroot level a thlen theihna atana an din a nih thu sawiin, "Tunah chuan hmarchhak pumpui Congress lak ata an zalên tawh. Congress sorkar lai khan hmarchhakah hmasawnna hna an thawk lo," a ti a; Congress party chuan hmarchhakah harsatna an siam niin a sawi. Inhmuhkhawmnaah hian Mizoram Lok Sabha MP C Lalrosanga pawh a tel.