Kan hmachhawp - organic hmanga thlai thar - Agriculture Minister

Agriculture minister C Lalrinsanga chuan nimin khan Mizo Hnam Rúna inkhawmah thu sawiin, Mizorama thlai enkawlnaah chemical hmang lo a, organic hmanga thar chu an hmachhawp a nih thu a sawi a, "Pu Zoramthanga kaihhruai sorkarah thawk­tute'n mawng­vawm bá ang maiin hna kan thawk chur chur mek a ni," a ti.

C Lalrinsanga chuan, MNF sorkar hmasak laiin Organic Act an siam tih sawiin, "Sorkar kal ta khan a ûm zui ta lo a, keini chuan theihtawp chhuah zel kan tum. Kan thlai tharte hi organic a nih loh chuan man a man zo tak tak lo," a ti a; organic-in hlutna a neih chhan chu, organic leiṭha hmanga thlai thar a hrisel zawk vang a nih thu a sawi. 

MNF an sorkar tirh aṭangin thlai/vaimim ei chhetu rannung a puang tih sawiin C Lalrinsanga chuan, "Thawktute nen theihtawp kan chhuah avangin a ziaawm thei. Biological control unit hmangin rannung, thlai seh chhetu kha rannung vêka ei let vetu tur phai aṭangin kan chah tawh a, chemical hmanga rannung thah vak ai chuan mihring tan a him zawk a ni," a ti.

Agriculture Minister chuan, bio-fertilizer lamah ṭan an la tih sawiin, "Biological Control Laboratory din turin Lengpuiah kan ruahman tawh. Kan leilunga bacteria chi khat hmanga lei tihṭhatna siam kan rilrûk mek a, farmer-te mamawh technology thiamna hrang hrang puak chhuah kan tum. Central Scientific Industrial Research (CSIR) te, Mizoram University leh department ten hmalak kan tum," a ti a; chemical hmang lo a, organic hmanga thar hi an hmachhawp lian tak a nih thu a sawi a ni.

MNF chu behchhan neia kal an nih thu sawiin C Lalrinsanga chuan, "Nationalism kalpuitu kan ni. Pathianin hnamah min siam a, kan tê emaw, lian emaw, mahni hnama ding nghet turin Pathianin min duh a, mahni hnam tihdan phung zâwm tlattute an ral ngai lo a, economy leh development-ah Pathianin mal a sawm ṭhin. MNF chu thisenin a nemngheh party kan nih hi theihnghilh thiang a ni lo," a ti a; hnam rilru an put tlat chuan Pathianin mal a sâwm dawn tih a sawi.