Lunglei MPC-in ZPM an zawm

Lunglei Sub. Headquarters MPC president ṭhin Lalrinzuala (Pamama) chuan nimin khan Lunglei Press Club-ah thuthar thehdarhtute kawmin, Lunglei Sub. Hqrs. MPC-te chuan ZPM an zawm thu a puang. Lalrinzuala hi ZPM a din aṭangin ZPM Southern Hqrs. Chairman a ni.

Lalrinzuala chuan August 15, 2017 khan Zoram hma­sawnna duhtu pawl leh party hrang hrangte chu ram kal siam turin ZPM-ah an inchhun luh thu sawiin, "Kum 2018 general election pawh flag pakhat hnuaiah symbol pakhat hmangin kan hma chhawn a ni. Tichuan Pathian leh Zoram mipui duhsakna changin, kum khat chauha upa pawl dingthar chuan MLA pariat lain, pahnihna phei chu a tam zawkah kan hauh a ni,"  ati.

ZPM-in Election Commis­sion of India hnuaia registration a tihfel hnuah Zoram mipuiin automatic-a ZPM-a awm pawl hrang hrangte lungrual taka an awm tura an ngaih thu sawiin Lalrinzuala chuan, "MPC Hqrs. hruaitu  ṭhen­khatte an hel ta tlat a, a pawi hle a ni," a ti a, MPC Sub. Hqrs. chuan an hqrs.-in ZPM-a lut tura sawmna pawm ve se tia rawtna an siam thu a sawi.

Lalrinzuala chuan an rawtna chhanna 'ZPM hi a awm tawh loa, chuvangin in lehkha hi committee chhan tlakah kan ngai lo' tih a nih thu sawiin, "Ram leh hnam leh kan party tana ṭha tura kan ngaih ngaihtuah tlaka an ngai lo hi hriatthiam har kan ti a, sub. hqrs. hmuhsitnaah kan ngai a ni. Chuvangin MPC aṭanga ban kan rel ta a ni," a ti.

Kan ramri te, foreigner issue te, corruption-te leh khaw­tlang sualna pung nasa ta lutukah puh tur dang a awm loh thu sawiin Lalrinzuala chuan, "Kum 30 chhung party pahnihin sorkarna an in siam chhawk a, hei hi kan thleng a ni," a ti a, Zoramin kalphung thar, sorkar thar, hruaitu thar a mamawh thu a sawi.