Fall armyworm-in Mizoram pumpuiah Vaimim cheng nuai 11.8 vel hù a tichhia

Pangang chi khat, fall armyworm kumina puangin Mizoramah vaimim hmun hectare 3,409-a zau a khawih a, keh tlâk loh khawpa vaimim a seh chhiat chu hectare 37.70 vela zau niin, vaimim a tihchhiat zawng zawng chu cheng nuai 11.8 vel hùa chhût a ni. Fall armyworm do nan cheng nuai 58 chuang sên a ni bawk.

RTI Act hmanga zawhna Agriculture department-in an chhan danin, Mizoram pumah kumina fall armyworm puang chu chhungkua 9,307-in an tuar a; Lunglei district-ah harsatna tâwk tam berin, chhungkua 3,689-in harsatna an tâwk. Champhai district-ah chhungkua 1,440, Serchhip district-ah chhungkua 1,403, Mamit district-ah chhungkua 1,198, Kolasib district-ah chhungkua 873, Lawngtlai district-ah chhungkua 604, Aizawl district-ah chhungkua 585 leh Siaha district-ah chhungkua 388-in harsatna an tâwk a ni.

Fall armyworm puang chu hmanraw chi hrang hrang leh rannung thahna hlo pesticide hmanga do lêt a ni a, sorkarin kawng hrang hrangin hma a la. Agriculture Secretary kaihhruai State Level Sub-Committee on Incidence of Fall Armyworm din a ni a, State Level Rapid Response Team on Fall Armyworm din nghal a ni.

Chanchinbu leh television hmangin fall armyworm chungchang leh a do lêt dan tur zirtirna tihchhuah ṭhin a ni a, rannung thahna hlo leh hmanruate loneitute hnenah pek a ni. Agriculture department-a thawktute'n lo-ah kal chilhin pesticide hman dan an zirtir a, Indian Council of Agriculture Research, Indian Institute of Maize Research leh National Bureau of Agriculture Insect Resources nen ṭanghoin Aizawlah fall armyworm chungchang zirhona leh inrâwn khawmna buatsaih a ni. YMA branch hrang hrangah fall armyworm thlahtu phengphehlep suat nan zanah meipui chheh a ni bawk.

Kuminah fall armyworm puang vangin Mizoramah vaimim thar a tlem phaha hriat a ni a, kum 2018-ah vaimim metric ton 10,567 thar a nih laiin, kuminah chuan metric ton 8,736 thar beisei a ni.