MNF party leh BJP inkar sawifiah turin MPCC-in CM Zoramthanga an phût

Mizoram Pradesh Congress Committee (MPCC) Communication department chuan, chief minister leh MNF party president Zoramthanga chu MNF party leh BJP inkar sawifiah turin an phût.

MPCC Communication department chuan, India hmarchhak state zawng zawng chu North East Democratic Alliance (NEDA) chief minister-te hnuaiah an awm vek tawh angin CM Zoramthanga'n nimina Guwahati-a NEDA meeting-ah a sawi niin an tarlang a, "Hmarchhak state zawng zawng NEDA chief minister-te hnuaia awm vek kan ni tawh titu Pu Zoramthanga, Kristian mipui thlantlin hian BJP hlau hauh lo leh huaisen taka Mizoram a kaihhruai theih hun hi nghakhlel takin kan thlir mek a ni," an ti.

Congress party chuan, BJP MLA Dr Buddha Dhan Chakma-in social media platform hrang hranga Mizoram CM Zoramthanga chu diriam tak takin a ṭawngkhum nia sawiin, "A pawi hle a, ram neitu Mizote tan a tlàwmthlak hle. Hei vang hian huaisen takin CM hian BJP leh MNF inkar hi sawi chiang rawh se," tiin an phût a; BJP MLA-in diriam tak taka Mizoram CM chungchang social media lama a sêlna chu tàwp tawh se an duh thu an tarlang.

MPCC Communication tarlan danin, social media ṭhenkhatah BJP MLA Dr BD Chakma chuan Mizoram CM Zoramthanga chu deusawh taka sawiin, lehlama awrdum, lehlama awrsen a nih thu a sawi a, 'BJP lam a thlàwp chuan Delhi-ah a awm tihna a ni a, BJP a thlàwp loh chuan Aizawlah a awm tihna a ni,' tiin social media-ah a tarlang a ni.

Mizoram BJP Whatsapp group-ah BD Chakma chuan, an party-in state leh CSS funded project reng renga Mizoram BJP-in 25% an dawng dawn tiin MNF-in intiamkamna an ziak lo a nih chuan, MNF aṭangin eng dinhmun mah chelh a tum loh thu a sawi a; chu chu Congress party chuan MNF-in an dinhmun dik tak an sawi ngam loh vangah an ngai.

'Kan party mi leh sa tan condition ṭha tak awm lo chuan eng offer pawh ka duh miah lo ang. Ka hming hmangin MNF-in Central lam aṭanga pawisa an hai chhuak hi ka duh lo,' tiin social media-ah a sawi bawk niin an tarlang.

MPCC Communication department chuan, BJP MLA pakhatin Mizoram CM a deusawh chu Mizoram mipui tan a zahthlâk hle tih sawiin, "A awr a sen nge, a dum tih hi huai takin Pu Zoramthanga hian puang turin kan phût. Mizoram mipui leh roreltua siamtu Pathian hriatah hian BJP nena an inlaichìn dan hi puang turin kan phût a ni," an ti.

Congress party chuan, BJP bultuma nimina 4th NEDA Conclave, Guwahati-ah CM Zoramthanga'n thu a sawinaah, 'India hmarchhak state zawng zawng chu NEDA CM hnuaia awm vek kan ni tawh,' tiin a sawi tih an tarlang a; Kristiante leh sakhaw tênau dangte hual chêptu BJP thluak bûr Amit Shah-a kianga din lan ve loh hlaua Kristian chief minister a hmanhlel lutuk chu lung­chhiatthlak an tih thu an sawi bawk.