KHAWTHLIR

September 7, Pathian­ni tlai dar 3:30 vel khan Seling khuaa Don Bosco School péngah bike a chesual a, mi pahnih an thi. Seling YMA hruaitute hnen aṭanga thu dawn danin, bike hnunga chuang Samuela s/o Mahindra Tamang chu Thingsul­thliah damdawi-in panpui a nih hnuah a thi a; bike khalhtu Lalrinchhana (18) s/o Zozinga, Seling chu Aizawl panpui niin, Pathianni zan zanlai dar 12:30 velah LRM Hospital-ah a thi. Samuela ruang hi a pa hnathawhna Tuikhuah­tlangah lak a ni a, Lalrinchhana chu Selingah vui a ni.

Dâpluia tla hlum Rebecca Lalnunthari (4) d/o Biaklawma, Dapchhuah khua chu nimin zing lam dar 9 vel khan a tlakna aṭanga thlang lam (Tut lui) km. khat vela hlaah thia lak chhuah a ni. Tarlan tawh angin, Rebecca Lalnunthari hi September 7, Inrinni chawhnu dar 2 vel khan Dapluiah chesualin a tla a ni.

Rangvamual kawnga zu inna sûlhnu hnawk chu Central YMA ruahmanna angin September 7, 2019 khan Vaivakawn, Hunthar Veng, Rangvamual leh Phunchawng branch YMA member-te'n hnatlangin an thian. Hnatlangte mamawha hman atan Aizawl Municipal Corporation chuan Rs. 10,000 a pe a, AMC aiawhin bialtu councillor Zonunsangi Fanai-in a hmunah a hlan a ni.

Excise & Narcotics department chuan August 2019 chhung khan zu zuar mi 211 leh zu rûi 29 an man. Rakzu litre 9,985.925, sapzu ml. 750 ûm 1,361 leh ml. 375 ûm 279, zu bilh lai ṭin 12,413, dawidim kg. 7.918, zu sakna bél 72 leh zu kaihhnawihah lirthei 36 an man bawk.

Fisheries department chuan nimin khan Bawngkawn Cold Storage, Sairang road-ah sangha chi a man chanvein an hralh chhuak a, Fisheries minister K Lalrinliana'n a enpui.