Mizoram dinchhuahna kawng pawimawh ber pakhat chu zirna - Rev.Dr K Thanzauva

ZPM party-a consultant Rev.Dr K Thanzauva chuan nimin khan an pawl pisaah thu sawiin,  Mizo ram leh hnam siamṭha turin political party leh kohhrante'n mawhphurhna an neih vek thu leh Mizoram dinchhuahna kawng pawimawh ber pakhat chu zirna a nih thu a sawi.

Rev.Dr K Thanzauva chuan, Mizoram ṭhenawm state-ahte hmasawnna hna ṭha tak taka thawh a nih laiin, Mizoramah chuan project leh manifesto hlamzuih leh hluihlâwn a tam hle tih a sawi a, "Eizawnna kawng hrang hranga hlawhtlingte lah chu sorkarin an ṭanpuinaa hlawhtlingah a puang ngawt ṭhin a, a náwlpuia kut hnathawktute'n sorkar scheme an hlawhtlinpui sawi tur a tlem hle a ni,” a ti.

ZPM Consultant chuan, "Zoram leh hnam siamṭha turin political party leh kohhrante'n mawhphurhna kan nei a, kohhranin social reform lamah nasa zawka investment a kalpui a ṭul hle. Kan thil tih dan leh kan tum dan zawng zawng hi a ṭha thei ang bera kan kalpui hunah hnam zahawm leh intodelh kan ni thei chauh ang," tiin a sawi.

Zo fate chu an ril a ṭám mek nia sawiin K Thanzauva chuan, "Rilṭám leh ṭàmchhàwlte dâwmkanna leh tihchakna atana ṭha ber chu na­chhâwkna chak pek, rate hre saa thlai thar chìntir a ni. Rua leh mau hmangin Zo fate hi kan dinchhuah mai a beiseiawm loh. Kan moral a dik lo a, hei hi Pathian thu leh zirna hmanga kan siamṭhat hmasak a ngai," a ti.