Mizoramin UC tihkhawtlai a nei tlem ber

North Eastern Council (NEC) secretary Ram Muivah chuan, NEC project hrang hrangah Mizoram chuan hna a thawh ṭhat thu leh, hmarchhak state pariat zingah utilization certificate (UC) tihkhawtlai (pending) nei tlem ber a nih thu a tarlang.

Mizoram sorkar thuchhuahin NEC Secretary thu sawi a tarlan danin, tun dinhmunah project hrang hrangah Mizoram sorkarin pawisa a hmuh belhkhawm aṭanga a la hman loh chu cheng nuai 859 a ni a, UC pending pariat a awm. UC pending neih tlem lama Mizoram dawttu chu  Sikkim a ni a, UC pending 20 neiin, chu chu cheng nuai 1636 vel hù a ni. Arunachal Pradesh leh Assam-te chuan cheng nuai 6,000 chuang UC pending an nei bawk.

Kumin 2019-20 chhungin NEC chuan Aspirational District hrang hrangte a rang thei ang bera district hmasawn zawkte tluk thei tura chawikan te, tourism, thingpui, bawnghnute, sangha khawi leh mau lamah chak zawka hmasawn hna thawh te, foreign trade lama hmasawn te, sik leh sa inthlak danglam chak lutuk do tura tui hna leh tui hnár humhalh leh border road siamṭhatte a tel.

NEC Meeting, Pathiannia ṭan chu nimin khan Guwahati-a Assam Administrative Staff College-ah chhunzawm a ni a; niminah chuan hmarchhak state chief secretary-te leh Central ministry thlan bik 13 aṭangin presentation ngaihthlak leh sawihona hun hman a ni.