Lunglei Joint NGO an lawm

NGO Coordination Committee, Lunglei chuan thuchhuah siamin, Ministry of Human Resource Development (MHRD)-in Mizoram chhim lama Mizoram University (MZU) Southern Campus din phalna a tichhuak chu lawmawm an tih tak zet thu an tarlang a, "A hlawhtlin theih nana sorkar hruaitu, MZU thuneitu, pawl hrang hrang leh mimal thâ thawhtu zawng zawng chungah thinlung takin lawmthu kan sawi a ni," an ti.

Lunglei Joint NGO chuan, Lunglei Pukpuia Engineering College chu hman theiha peih a nih thuai theih nan kawng, tui leh êng chungchanga hmalakna kal mek chu chak lehzuala chhunzawm turin Mizoram sorkar an ngen a; chutih rualin, Lungleia awm ṭhin Indian Railways Reservation Outlet tihtawp a ni chu pawi an tih thu sawiin, dah leh a nih theih nan hma laksak turin Transport Minister an ngen a ni.