Health Minister-in damdawi-in a tlawh

Health minister Dr R Lalthangliana chuan nimin khan Synod Hospital leh Adventist Hospital a tlawh a, thawktute nen Mizoram State Health Care Scheme thar kalpui a nih dan turte leh thil pawimawh hrang hrang an sawiho.

Synod Hospital a tlawhnaah Dr R Lalthangliana chuan, damdawi-in tihchangtlun kawngah kohhran lam aṭanga tih remchang si lo, sorkar lam aṭanga tih theih ang chi a awm chuan a theih ang anga ṭan lak an inhuam thu a sawi a, "Sorkarin October 1, 2019 aṭanga Health Care Scheme thar a kalpui tur pawh Synod Hospital pawhin an thlâwp a, ṭha taka an kalpui kan beisei. HCS thar hi langtlang taka kalpui tur a nih avangin thuruk a awm dawn lo a, inenkawlna rate zawng zawng pawh sorkarin notification a chhuah vek dawn a ni," a ti.

Inkawmhonaah hian Mizoram Health Care Society CEO Dr Biakthangsangi'n MSHCS thar chungchang a sawifiah. Synod Hospital hi kum 1928-ah nursing school nena din a ni a, a tirah doctor pakhat, nurse pakhat nen khum 14-a bul ṭan niin, tunah chuan doctor 36, nursing staff 203 leh khum 355 a awm tawh a ni.

Seventhday Tlanga Adventist Hospital a tlawhnaah pawh Health Minister chuan Mizoram sorkarin HCS thar a kalpui turah Adventist Hospital nen ṭha taka an thawhho theih a beisei thu a sawi a, "Sorkarin HCS thar a duang a, hei hi tihlawhtling tur chuan private damdawi-in leh kohhran damdawi-inte nen kan thawhho a pawimawh hle," a ti. Adventist Hospital-ah hian doctor panga an awm mek a ni.

Health Minister hi Health & Family Welfare Board vice chairman Dr ZR Thiamsanga, MLA leh Horticulture Board vice chairman Prof. F Lalnunmawia ten an ṭawiawm.