MNF-te'n BJP hlauh rûkna an nei tih a chiang tawh - Zodintluanga

Mizoram Pradesh Congress Committee (MPCC) treasurer Zodin­tluanga, MLA chuan, MNF party-te'n BJP hlauh rûkna an nei tih a chian tawh thu a sawi a, "MNF sorkar hian eng vanga BJP hi hlau em em nge an nih tih chu zawhna lian tak a ni," a ti.

Zodintluanga hian nimina Aizawl North-II Block Congress Committee-in Ramhlun North comunity hall-ah inkhawmpui an neih a hmanpuinaah thu sawiin, chief minister Zoramthanga a mangang hle niin a sawi a, "Hetiang em ema CM a mangang hi a mak. Delhi-ah kar hnih a zuk chám a, a rawn haw hnuah sawi tur a nei lo," a ti a; CM chuan minister-te an zuk kal ve huna project an siamna atan a zuk vaw dûp tihte a sawi mai mai thu a sawi.

BJP President-in a koh tawh chuan Zoramthanga chu Pathianni pawh zah zo loin a tlân zel mai tawh tih sawiin MPCC Treasurer chuan, "CM-te hi Pathianni kal ta khan Amit Shah hoin Guwahati-ah NEC meeting an nei a, a tûkah BJP kaihhruai NEDA meeting-ah a tel. Chief Minister hlui Pu Lal Thanhawla chu Pathiannia meeting kohah a tel ngai lo. Pu Zoramthanga hian Pu Lal Thanhawla a rawn chawimawi chho zel a ni. Hmasawnna thil rêng rêng ni se, Pu Zoramthanga hian Pu Lal Thanhawla a phâk ngai dawn lo," a ti.

Zodintluanga chuan, Congress party-in Mizorama sorkarna an chan lai khan sorkar laipuiah Narendra Modi kaihhruai kum 5 chhung an hrawn ve tho tih sawiin, "Mipui zingah kan hlauh thu hria an awm lo. Award chi hrang hrang kan la zawk a, hmarchhaka NEC hnuaia tiṭha ber, India rama health index ṭha ber, Urban Development hnuaiah award pali leh horticulture hnuaiahte award-te kan la a ni," a ti a; BJP sorkar hnuaiah tho State Referral Hospital siamṭhain, medical college an din thu a sawi. 

Mizorama BJP-in MLA an neih chhunin Mizoram Chief Minister chu fiamthu thawhna atan a hmang tih sawiin Zodintluanga chuan, "Mizoram BJP President lah chuan an MLA chung­chang chu NEDA convener Himanta leh Pu Zoramthanga ten an sawi dun tur thute a la sawi deuh deuh a. MNF hian BJP hlauh rûkna riau an nei tih a chiang tawh a, chutiang chu kan hrawn MNF sorkar chu a ni. Kan hun laiin an leiba nasa tak rulh nan kum hnih chuang kan inhrêk a, India rama state sum dinhmun ṭha berah kan insiam thei a ni," a ti.

MPCC Treasurer chuan, Zoramthanga kaihhruai sorkar ringtu an tlahniam tawh hle nia sawiin, "MLA inthlan hnuhnung berah khan 63% laiin MNF hi an duh lo a, a duhtu 37% zingah pawh MNF sorkar ringtu an tlahniam nasa em em. Inthlan hmaa cheng nuai thum kan sem dawn a tih chu an sorkar hnuah Assembly House-ah cheng nuai thum an sem loh tur thu sawiin 'Project base-in kan kal ang' a ti ta daih a ni," a ti a, MNF chu an chêt dan avangin mipuiin an ring lo tial tial niin a sawi.

• MNF-in BJP an hlau ru tih a chiang

• Modi sorkar kan hrawn, kan hlau ve lo

• CM zinin hawn sawi tur a nei lo

• CM-in Pathianni pawh a zah lo