KHAWTHLIR

Mizo Chelsea Supporters’ Club chuan nimin khan AMC Ward-V huam chhung Zarkawt, Chanmari leh Electric Vengah 'No Plastic Rally' an buatsaih a, Ward-V councillor Rosiamngheta'n a vai liam. Rosiamngheta chuan, AMC-in plastic hman khapna dan a tih chhuah chu mi tam takin a takin an kalpui mek tih sawiin, "Keini chauh ni lo, kan tu leh fate tan ṭhahnemngai takin tun aṭanga hma kan lak a ngai a ni," a ti. Rally-ah hian kawngpui dunga plastic aṭanga thilsiam an paihte an chharkhawm a ni.

Social Welfare minister Dr K Beichhua chuan nimin khan Sihphir khua Sinners' Friend Rescue Centre annexe main building a hawng. Dr K Beichhua chuan, ruihhlo ngaite tisa leh thlarau lama enkawlna tur building thar hawn theiha a awm leh ta chuan nasa taka a tihphûr thu sawiin, "He hmun ka thlen hian ka rilruah 'Pên rawh, pên zel rawh' tih a lang a ni," a ti. In hi Lalmalsawmi, Bungkawnin a pasal F Lawmkima leh a fapa Jimmy Lalnunzira te hriatrengna atan Rs. 8,00,000 a thawh hmanga bul ṭan a ni a, mi tlawmngaite'n thawh belhin, cheng nuai 14 vel senga sak a ni.

Nimin khan Champhai Venglai community hall-ah Champhai East Area MUP Léngkhawm Zai Intihsiak neih a ni a, Art & Culture director R Hmingthanzuala'n a hmanpui a, MUP Gen.Hqrs. president Lalhuap­zauva chu khualzahawm a ni. Intihsiaknaah hian Champhai East Area MUP chhunga branch pariat aṭangin member 373 an tel a; pakhatna Champhai Zion Vengin Rs. 15,000, pahnihna New Champhai-in Rs. 12,000 leh pathumna Champhai Venglai-in Rs. 9,000 an dawng.

Aizawla Electric Veng Village Defence Party (VDP)-in an veng huam chhung, Power House bula site office building thar an neih chu nimin khan Aizawl North-III bialtu MLA C Lalmuanpuia'n a hawng.