CM Zorama'n Textile Minister a kâwm

Chief minister Zoramthanga chuan nimin khan Union Textiles mi­nister Smriti Zubin Irani chu New Delhi-a a pisaah a hmu a, Mizoram leh India hmarchhak state danga geotechnical textile hman chungchang a sawipui.

CM Zoramthanga chuan, India hmar­chhaka Geotechnical Textiles Promotion scheme kalpui mek chu March 2020-ah a tàwp dawn avangin, March thla hnu lamah pawh chhunzawm zel a nih theih nan hma la turin Textile Minister a ngen a ni.

Chief Minister chuan, khawtlang hman tur tui­zém lian atan te, lo leh leileta tui mamawh dah khawlna tur leh leimin tur vênna atan te, kawng siamna atante geotextiles chu India hmar­chhakte tan leh, a bikin Mizoram tan a ṭangkai dawn tih a sawi a; horticulture sector atana geotechnical textile hman ṭangkaina turin ruahmanna thehluh a nih tawh thu a sawi bawk.

Zoramthanga chuan, Ministry of Textiles-in DoNER hnuaiah 10% Gross Budgetary Support for North Eastern Region atan sum la hman loh cheng vbc. 150.25 a neih chu hman a nih theih nan hma laksak turin Smriti Zubin Irani a ngen nghal a ni.