Lawngtlaiah SDG zirho a ni

Planning & Prog­ramme Implementation department huaihawtin nimin khan Lawngtlai DC pisa conference hall-ah hmasawnna ngêlnghet nei tura hmalakna tur Sustainable Development Goal (SDG) zirhona buatsaih a ni.

Workshop hi Lawng­tlai additional DC K Laltlawmlova'n a kai­hruai a; Aizawl aṭanga hmanpuitu Planning additional secretary Saihlira chuan, sorkarin mipui hnena sum pek a, an duh dan dana hmantir aiin, ruahmanna fel tak nena an mamawh ang zat zela sum pek lam a kalpui tawh tih a sawi a, "Hmasawnna ngêlnghet nei turin department hrang hrangte thawhho ṭhat a, ruahmanna fel tak siam thiam a pawimawh," a ti.

SDG consultant C Vanlalzawna leh C Lalnunmawia ten SDG awm­zia leh Mizoram dinhmun te, SDG-in a tum leh hlawhtlin dan tehna (indicator) hrang hrangte an sawifiah bawk.

SDG zingah - retheihna ûmbo, ṭâm tihbo, hriselna ṭha, zirna ṭha, hmeichhia leh mipa in­tluktlanna, tui thianghlim hnianghnâr neih leh faina lam, ei leh bara hmasawnna, leilung leh a chhehvel boruak humhalhte chu a langsar zual a ni.