CYMA-in hnam dang dan loa sumdawng an chhinchhiah

Central YMA hnuaia Vigilance Sub Committee member-te chuan February 22, Inrinni khan hnam dang, dan loa Aizawl khawpuia sumdawng - iron rod, cement leh balu zuarte an zawng chhuak a, an chhinchhiah.

CYMA Vigilance Sub-Committee secretary HF Lalrinpuia hnen aṭanga thu dawn danin, Inrinnia hnam dang dan loa sumdawng zawn chhuah hna an thawh chu a bul ṭanna a ni a, chhunzawm zel an tum. Dan loa sumdawng hmuh chhuahte chu chhinchhiah zel a ni a, a ṭul angin thuneitute nen hmalak zel dan tur rêl a ni ang.

HF Lalrinpuia chuan, Aizawlah hnam dang dan loa sumdawng an tam tawh hle tih sawiin, "Hei bakah hian Aizawl daia sumdawng zawng zawng deuh thaw hi hnam dang an ni. CYMA hmalakna hi ram leh hnam tana thil ṭha leh pawimawh tak a nih avangin Mizo mipuite chu ṭha taka thláwp tur leh theih ang anga puibàwm a, thuràwn pe turin kan ngen a ni," a ti.