Mizoram Anti-Tobacco Day hman a ni

Vaihlo leh ruih theih thil dopui kan puang tur a ni - CM Zorama

Indian Society on Tobacco & Health (ISTH) Mizoram Chapter leh National Tobacco Control Programme (NTCP)-te huaihawtin, nimin khan Chanmari YMA Hall-ah Mizoram State Anti-Tobacco Day vawi 6-na hman a ni a, chief minister Zoramthanga khuallian a ni. Chief Minister chuan, "Taksa tana chhiatna thlen thei vaihlo leh ruih theih thil reng reng dopui kan puang tur a ni," a ti.

CM Zoramthanga chuan, vaihloin hriselna a khawih nasatzia inzirtirna a tam tial tial leh vaihlo ti an tlem hret hret chu lawmawm a tih thu a sawi a; "Meizûk khap kawngah hma kan la nasain hma kan sawn hle a, hmabak erawh chu a la tam hle," tiin, kal khawmte chu vaihlo laka inthiar fihlîm turin a sáwm.

Hmanlai Mizo nunah chuan meizûk an pawisa lo ni mai loin, fehnaah thosi hnawh darh nana vaihlo an zu ṭhin tih sawiin Zoramthanga chuan, tunlaiah erawh chuan vaihlo mamawhna a awm tawh lo a, taksa tichhetu a nih avangin sim a hun tawh thu a sawi a, "Chhia leh ṭha hriatna nei vek kan ni a, kan taksa chhiatna tur chu ti lo mai tur kan ni. Vaihlo lo ti tawh leh ti mekte tan tumruhna nen tih theih loh a awm lo," a ti.

Chief Minister chuan, vaihlo aṭanga siam thil dang - sahdah, tuibúr, gutkha leh a dangte laka pawh fihlim a pawimawh thu leh a ti ṭhinte'n an sim theih nana ṭan lak a ṭul thu a sawi bawk. Chief secretary Lalnunmawia Chuaungo chuan, Mizoramin kum 2014 aṭangin Anti-Tobacco Day a hmang ṭhin tih sawiin, "Kum tin hmang zelin, zawi zawiin awareness mipuiah a siam a, vaihlo ṭhat lohnaah kan harh chhuak zel hi thil lawmawm tak a ni," a ti. Chutih rualin, Global Adult Tobacco Survey-2 (GATS-2) 2017-in Mizo mipa 54% leh hmeichhia 14%-te'n meizial an la zûk thu leh, sahdah, tuibur, etc. ti mipa zingah 21% leh hmeichhia zinga 46% an la awm thu a sawi.

ISTH Mizoram president Lal Riliani pawhin thu sawiin, vaihlo chu cancer thlentu lian ber zinga mi a nih thu a sawi a, "Mizoram hi cancer vei an tam em avangin cancer capital ang hiala sawi ṭhin a ni a, vaihlo zûk leh hmuam lakah mipui an fihlim duak chuan nasa takin cancer vei thar an tlahniam dawn a ni," a ti.

Anti Tobacco Day-ah hian thupui chu 'Vaihlo leh chuap hri­selna' tih a ni a, thupui hi NTCP state nodal officer Dr Zoram­mawia'n a sawi. CM Zoram­thanga'n ISTH Mizoram life membership mi 47 hnenah certi­ficate a sem a; kal­khawmte'n zûk leh hmuam hrang hrang laka inthiar fihlim a, mi dangte kawng dik kawhhmuh turin thu an tiam a ni.

Report-a a lan danin, Mizoram chu GATS-1 ah vaihlo hmang nasa ber state a ni a, GATS-2 ah erawh chuan hmang nasa pahnihna a ni tawh. Kum 2017-ah Aizawl Civil Hospital-a survey (sample size 59) neihah damlo phaia refer zinga 35.59% chu mei zu ṭhin an ni a, refer zinga 25.42% chu cancer natna vei an ni. Cancer vei phaia thawn zinga 80% chu vaihlo zûk/hmuam ti ṭhin an ni bawk. Mizoram State Anti-Tobacco Day hi district dang khawpuiahte pawh hman a ni.