Bru chungchanga state dang hmalakna MZP-in an dodal dawn

MZP General Headquarters chuan thuchhuah siamin, Mizoram Bru-te chungchanga state dangte chêt dan leh Bharat Hitaraksha Abhiyan (BHA)-te hmalakna an duh loh thu an tarlang a, an dodal dawn tih an puang.

MZP chuan, Mizoram chhuahsantu Bru-te chu anmahni duh thu ngeia Mizoram chhuahsan an ni tih sawiin, "Vawi tam tak lo haw tura hmalak a nih hnua haw duh lo, Tripura-a awm Tuikukte chungchanga Madhya Pradesh, Delhi, Gujarat leh Maharastra state aṭanga mi 11-in tun hnaia hma an la leh Bharat Hitaraksha Abhiyan (BHA) intite'n Chief Minister hnena memorandum an thehlut hi kan duh lo a, thinurthlak hleah kan ngai. Mizo mipui zah lohnaah kan ngai a, na takin kan dodal tlat dawn a ni," an ti.

Tarlan tawh angin, Mizoram aṭanga tlanchhia Bru, Tripura refugee camp-a awm mekte chu tunlai hian Mizoram sorkarin a tawp nan hruai kîr tumin hma a la leh mek. Chutih lai chuan, Madhya Pradesh, Delhi, Gujarat leh Maharastra state-a MP-te'n chief minister Zoramthanga hnenah Bru-te chu Mizorama an lêt hunah a huhoa awmtir tura an ngensak bakah, chhawmdawlna chi hrang hrang an ngensak a ni.

State dang MP-te'n Bru-te hamṭhatna tura an rawn beihpui chu engti kawng zawng maha an pawm loh thu sawiin MZP chuan, "Heng mite hian an kuang lo an nawr a, an tih loh tawp tur an tiah kan ngai. Tuikukte hruai kîr chungchangah hian inrawlh tawh lo turin kan hriattir nghal a ni," an ti.

Thu dawn danin, September 7, 2019 khan Bharat Hitaraksha Abhiyan (BHA) tih pawl invuahte chuan CMO-ah memorandum an thehlut a, Chief Minister aiawhin a PS-in a lo dawng. Memorandum-ah chuan Bru chungchang ziakin, Bru hruai kîr turte chu a huhoa awmtir turin an ngensak a ni.

Bharat Hitraksha Abhiyan hian CMO tualah sit-in demonstration an nei nghal a, mi 140 vel an ni a; Madhya Pradesh, Maharashtra leh Delhi aṭangtea lo kal an ni a, an zingah MP pali an tel. Memorandum an thehluh hnuah Aizawl chhuansanin Silchar lam an pan nghal a, Silchar aṭangin rêlin an haw niin thu dawnna chuan a tarlang.

MZP chuan, "September 7, 2019 khan BHA mi eng emaw zatin CM Zoramthanga hnenah memorandum an thehlut a, Tuikukte hamṭhatna tur an rawn nawrpui hi kan duh lo hle," an ti a; Tripura a awm Bru, Mizorama hruai let chungchangah MZP chu an dinna ngaiah an ding reng tih an puang.

BHA mi eng emaw zatin Chief Minister's Office kawta sit-in demonstration an neih theih laia Mizo mipuiin an hre mang miah lo chu mak an tih thu sawiin, "Khati zatin CMO tuala lungawi lohna an lantir thut thei kha CMO security tan a him em tih pawh sorkar kan zawt nghal a. Khati zat state páwn aṭanga hnam dang lo lutte khan ILP an nei em tihte pawh sawifiah turin Mizoram sorkar kan ngen nghal bawk," an ti.