Puitling ziak leh chhiar thiam lo Mizoramah 36,700 vel an awm

Nimin khan Aijal Club-ah Inter­national Literacy Day hman a ni a, thupui chu 'Literacy and multilingualism' tih a ni. Special Eradication of Illiteracy Project (SEIP) chungchanga inrâwn khawmna neih a ni nghal bawk. Mizoramah puitling ziak leh chhiar thiam lo mi 36,700 vel an awm meka ngaih a nih thu tarlan a ni.

School Education minister Lalchhan­dama Ralte khuallian a ni a, Human Resource Development Board vice chairman L Thangmawia, MLA khual­zahawm a ni. SEIP hi kum 2021 chhiarpui hmaa literacy rate-a hmasawnna nasa zawk a awm theih nana hmalakna a ni.

Minister Lalchhan­dama Ralte chuan, Mizoramah ziak leh chhiar thiam 91.33% an awm laiin, thiam lo 8.67% an la awm thu sawiin, "Adult Education Wing, School Education department chuan ziak leh chhiar thiam kan pun zel theih nan hma a la reng a ni," a ti.

Lalchhandama Ralte sawi danin, kum 2015-a School Education department-in survey a neihnaah ziak leh chhiar thiam lo mi 43,341 an awm a, Adult Education Wing-in hmalakna hrang hrang a kalpui reng a, chumi hnuah puitling ziak leh chhiar thiam mi 7,000 vel awm belhin, tunah chuan puitling ziak lek chhiar thiam lo 36,700 vel an la awma ngaih a ni.

Minister chuan,  ziak leh chhiar thiam chu khawtlang leh ram hmasawnna atana hmanraw pawimawh ber a nih thu sawiin, ziak leh chhiar bakah, digital literacy thlenga inzirtir a ṭul thu a sawi a, "Ziak leh chhiar inzirtirna kawnga hmalakna hi School Education department-a thawkte hna chauh a ni lo a, khawtlang leh kohhran hruaitute leh Mizorama NGO hrang hrangte nena thawhhona ṭha kan neiha hma kan lak tlân a ngai. Kan hmel a mawi zual zel nan literacy rate-a ram puma pakhatna kan hauh theih nan ṭan ila tláng ang u," a ti. International Literacy Day hmanna inkhawm hi School Education secretary Esther Lal Ruatkimi'n a kaihruai a, director Lalzarmawii'n Literacy Day chungchang a sawi.