Mosque sak chhunzawm lo turin Mizoram sorkarin hriattirna a pe

Barabi Zophai hmun­a Mosolman biak-in (mosque) satu Ka­chur­chol Masjid Com­mittee-te hnenah Mizoram sorkar chuan September 10, Thawh­lehni zan dar 8:30 khan mosque sa chhun­zawm tawh lo tura hriattirna a pe.

Vanglaini thu dawn danin, Zophaia mosque sa tawh lo tura hriattirna hi Mizoram sorkar aiawhin Kolasib DFO (district forest officer) hminga pek a ni a; lehkha chu Kachurchol Masjid Committee chairman hminga kaltir ni mah se, a awm loh avangin secretary-in a dawng. Lekha copy hi Kolasib DC leh SP-te pek an ni bawk.

Kolasib DFO-in hriattirna a pekah hian, hun tiam pawh siam chuang loin Zophaia mosque satute chu sak chhunzawm tawh lo tura hriattir an ni. Mosque sa tawh lo tura tih an nih chhanah - Reserved Forest area chhungah forest lam kaihhnawih loh thil an tih vang a nih thu tarlan a ni.

Tarlan tawh angin, Assam leh Mizoram ramri ngaihtuahtu Chief Secretary kaihhruai Core Committee chuan Zophaia mosque sakna hmun chu Mizoram chhung a nih thu an tarlang a; status quo maintain tur a nih avang leh dan loa mosque sak a nih vangin Environment, Forest and Climate Change (EFCC department)-te chu mosque satute hna thawk tawh lo tura hriattirna pe tura tih an ni.

Hriattirna pek a nih hnua awmzia a awm lo a nih chuan Home Minister hoa sawihoin, Mizoram Police leh EFCC depart­ment ṭangkawpin mos­que sak mek chu ṭhiah a nih theihna atana hmalak ni se, an ti.