KHAWTHLIR

Mizoram State Commission for Women (MSCW) hotute chuan September 10, Thawhlehni khan Aizawl­a Integrative Unit for Crime Against (IUCA) leh Central Women's Jail an tlawh a; thawktute kâwmin, an hmalak dan leh harsatnate an zâwt. IUCA leh Central Women's Jail tlawhnaah hian MSCW chairperson Lallawm­chhungi leh member-te Prof. Zokaitluangi, Sylvie Z Ralte leh Lalrosangi te an tel a ni.

Aizawl district Special Court (NDPS Act) chuan methamphetamine (Meth) neitu Ramnunsiami d/o Vankunga (L), Zawngin khua chu kum 10 chhung táng tur leh Rs. 1,00,000 chawi turin a hrem. Ramnunsiami hnen aṭang hian police-te'n November 11, 2016 khan Ramthar Veng, Aizawlah meth mûm 5,676 an man a; Lucy Lalrinthari ṭhutna Court chuan thiam loh chantirin, September 9, 2019 khan hremna tur a tichhuak a ni.

Serchhipa awm Assam Rifles-te chuan nimin khan Zokhawtharah zirna pawimawhzia inzirtirna hun, 'Lecture on Importance of Education' an buatsaih a, zirlai 135 leh zirtirtu 12 an tel.

Faina kawnga a thawh hlâwk vanga Ministry of Jal Shakti Drinking Water & Sanitation-in September 6, 2019-a national award a hlan, Laltharzeli chu September 10, Thawhlehni khan an khua, Mamitah a haw a, Mamit DC pisa ruahmannain ropui takin an lo hmuak. Laltharzeli pualin inkhawm an buatsaih a, pawl hrang hrangin lawmpuina an hlan. Laltharzeli hmalak­nain Mamit district-a khaw hrang hrangah Children Sanitation Club 85 din tawh a ni.

SIRD-PR chuan nimin khan an conference hall-ah Mizorama block development officer (BDO)-te pualin ni thum awh tur 'Refresher training course for Block Development Officers' an buatsaih ṭan a, Rural Development additional secretary V Lalsangliana'n a hawng. Training-ah hian BDO 14 an tel a, September 13-ah zawh a ni ang.