Ran enkawlna kalphung thar hawng

Ran natna enkawlna tura sorkar laipuiin scheme thar a siam, National Disease Control Programme (NADCP) for Foot and Mouth Disease (FMD) & Brucellosis leh ran kah raina (Artificial Insemination) programme hawnna hun nimin khan College of Veterinary Science & Animal Husbandry, Selesihah buatsaih a ni a, Lok Sabha MP C Lalrosanga'n a hmanpui. He programme hi KVK-te'n hmun hrang hrangah an buatsaih bawk.

C Lalrosanga chuan, Prime Minister-in ran enkawlna tur programme lian tham tak, India ram pum huapa a hawng chu lawmawm a tih thu sawiin, "He programme atan hian cheng vbc.13,434 ruahman a ni. Mizorama ran vulhtute pawhin scheme hi an chhawr ṭangkai ngei ka beisei," a ti.

Mizote ran vulh kawngah an la intodelh lo hle tih sawiin Lok Sabha MP chuan, "A bikin bawnghnute aṭanga siam chhuahah phei chuan kan la intodelh lo hle a, intodelh tura ṭan kan lak zel a pawimawh," a ti a; Mizoramah hmun ruak a la tam avangin sorkar leh kut hnathawktute'n tih tak zeta an beih chuan state páwna thawn chhuah tham thar theih a nih thu a sawi.

KVK, Lengpuiin an hmuna National Animal Disease Control Programme for Foot & Mouth Disease, Brucellosis and Nationwide Artificial Insemination programme an buatsaih chu senior scientist & head Dr Vanlalhruaia Hnamte-in a kaihruai a, MLA Dr Vanlalthlana khuallian a ni.

Dr Vanlalthlana chuan, ran natna darh zel bei let turin hmalakna tur zir chian hmasak ṭhin a pawimawh thu a sawi a; MLA-te chu mipui thlan chhuah an nih ang ngeia an beiseinate hrilha nawr turin mipuite a chah. Siahaah chuan National Animal Disease Control Programme for Foot & Mouth Disease, Brucellosis and Nationwide Artificial Insemination hi MYA Multipurpose Hall-ah hman a ni a, MADC executive member (AH&Vety) Beihrahmo Syhly chuan a hmanpui. North Vanlaiphaia KVK leh AH&Vety department pawhin Lungkawlh community hall-ah an hmang a, scientist & head Dr T Vanlalngurzauva'n kaihruaiin, N. Vanlaiphai SDO (Civil) Dorothy Muansangi khuallian a ni.

Khaw hrang hranga programme hmannaah hian ran vulhtute an kal khawm a, ran enkawl dan, hlâwk zawk leh thianghlim zawka ran vulh dante leh natna laka ran vulhte an him theih nana hri danna (vaccine) pek dan leh enkawl dante zirtir an ni. Hmun ṭhenkhatah chuan veterinary doctor-te'n bawng vulhah artificial insemination (kah rai) an ti nghal bawk.