Hmeichhe kaihhnawih dante zirho a ni

Mizoram State Commission for Women (MSCW) leh National Commission for Women (NCW), New Delhi-te chuan nimin khan Synod Conference Centre-ah 'Laws Related to Women' tih thupui hmangin legal awareness an buatsaih a; Social Welfare minister Dr K Beichhua'n a hmanpui.

Awareness hi MSCW chairman Lallawm­chhungi'n a kaihruai a; Dr K Beichhua chuan, hmanlai hmeichhiate ngaihdan tam tak Mizo pate'n an neih ṭhin chu tun khawvelah a dik vek tawh lo tih sawiin, "Ram leh hnam changkang tehna hi society-a hmeichhia­te dinhmun a ni ṭhin. Mizo hmeichhia chhuanawm tam tak an awm tawh a, ei leh bar zawnna kawngah leh zirnaa hlawhtlinna pawh mipa aiin hmeichhiate'n an ngah tawh zawk a ni," a ti.

Minister Bei­chhua chuan, hmeichhiate dinhmun chawikàn zel sorkar laipui leh Mizoram sorkarin an ngaih pawimawh thu a sawi a; Mizo hmeichhe din­hmun a ṭhat leh zual theih nan legal awareness programme chu hmang ṭangkai tur leh sorkar hnenah thuràwn pe turin a sáwm.

Legal awareness-ah hian kohhran hrang hrang aiawh hmeichhe hruaitute leh tlawmngai pawl hruaitute an tel a; MSW hnuaia Legal Cell member Dr PC Lalramenga'n hmeichhia­te hriselna chungchang a sawi bakah, Dan hnuaia hmeichhiate chanvo leh rorelna, The Protection of Women from Domestic Violence Act, 2005 leh The Marriage, Divorce and Inheritance of Property Act, 2014-te zirho a ni.

Inkhawmah hian Social Welfare department-in Poshan Abhiyaan Awards 2018-19  leh Overall ICDS-CAS Implementation Award 2019 an dawn avangin MSW chuan lawmpuina a hlàn a; Mizo hmeichhia chartered accountant zir zo tawh - Laltluangkimi Chinzah, Jewel Lalṭhasangzuali leh RS Roneihpuii te hnenah chawimawina an hlàn bawk. National Commission for Women hi January 13, 1992-ah din a ni a; a hnuaiah Mizoram State Commission for Women a awm a ni.