MNF-in AMC manifesto an tlangzarh Sorkarna kan siam ka ring - MNF President

MNF President chuan, AMC inthlan chu a narân lo tih sawiin, "Mizoram mipui hmun thuma ṭhena hmun khat awmna leh mithiam zawk awm khawmna a nih avangin election awm tur hi a pawimawh em em. AMC hi a tirah municipal council tiin MNF-in bul kan ṭan a, a neitu kan ni a, mi dangte chu vai party lo pêm lut an ni. Keini chuan a takin hna kan thawk ang. Sorkarna siam ngei pawh kan inring," a ti. 

Kum 2018 MLA inthlanah ZPM thâwm a na ber nia sawiin Zoramthanga chuan, "Keini chu kohhran thawhpui leh kohhran hi kan unit, an ti. Sorkar siam an inrin avangin chief ministerial candidate an nei a nih kha. MLA inthlan result a chhuah meuh chuan MLA pariat an nei," a ti a, ZPM chu mipuiin an hriat chian tawh avangin an zuih telh telh niin a sawi. 

Zoramthanga chuan, ZPM hruaitute chu inthlan dawn apianga symbol thlak ngai an nih thu sawiin, "An hotupa phei chu a awm tawhna party zat hi thaw loa sawi theih a ni lo. Hming pawh an phuah hraw hle ṭhin. CM candidate, secretary general, Val Upa Council, general secretary neiin, OB chungah leader nen inkulh rup mah se, baloon ham puar hawlh thêp angin an original size tiat lek an ni tawh," a ti. 

MNF President chuan, India ramah Cong­ress an tlachhe tawh nia sawiin, "President pawh thlang thei loin an awm. An President rei ber chu Sonia Gandhi a ni. Ani kha Kristian a ni a, a fapa Rahula tan Lord Krishna hnenah malsawmna a dil a, a kaihhruai lai ngeiin Congress chu an chhe ta vek a ni," a ti a; Mizoramah pawh Congress chu zu an zawrh avangin tun din leh ngaihna a awm tawh lo niin a sawi. 

Inkhawm hi MNF senior vice president Tawnluia'n a kaihruai a; AMC inthlana an manifesto chu hlâwm panga - inawpna, vantlang mamawh, ṭhalaite hmakhua, hmasawnna hna leh vantlang hriselna tiin an ṭhen a ni.