COVID-19: Mizoram dinhmun Hri kái zinga 99.04% chhuak tawh

Mizoramah January 29, Zirtawpni khan Covid-19 vei mi pathum leh January 30, Inrinni khan mi paruk hmuh chhuah a ni a, ni hnih chhungin mi pakua hmuh belh a ni. Inrinni leh nimin khan mi 12 chhuahtir an ni a; hripui vei hmuh tawh mi 4,372 zinga 4,330 (99.04%) an chhuak tawh.

Sorkar thuchhuah tarlan danin, Covid-19 vei January 29-a hmuh chhuahte chu TrueNAT-PCR hmanga hmuh mi pakhat leh Rapid Antigen Test (RAT) hmanga hmuh mi pahnih an ni a, ZMC laboratory-a endik zingah hripui vei an awm lo. January 30-a hripui vei hmuh mi paruk chu RAT hmanga hmuh chhuah an ni a; ZMC leh TrueNAT-PCR hmanga endikte an negative vek. 

Inrinni khan Covid-19 laka fihlîm tawh mi panga chhuahtir an ni a, nimin khan mi pasarih chhuahtir leh an ni. Ni hnih chhunga chhuak mi 12-te chu Aizawl district-a mi 10 leh Serchhip leh Kolasib district-a mi pakhat ve ve an ni. 

Mizorama Covid-19 vei hmuh chhuah tawh chu mi 4,372 an ni a, mipa 3,192 leh hmeichhia 1,171 an ni. Nimin tlai dar 5 thleng khan mi 4,330 (99.04%) chhuahtir an ni tawh a, mi pakua (0.21%) thi tawhin, enkawl mek mi 33 (0.75%) an awm. 

January 29, Zirtawpni khan ZMC laboratory-ah swab sample 123, TrueNAT-PCR hmangin district pasarihah sample 120 leh RAT hmangin district 11-ah sample 491 endik a ni a; sample endik zawng zawng chu 734 niin, chu'ng aṭanga Covid-19 vei hmuh chhuah mi pathum chu 0.41% a ni.

Hripui vei Zirtawpnia hmuh chhuah mi pathumte chu state páwn aṭanga tun hnaia rawn lut hnam dang pakhat leh Bawngkawn veng mi pahnih, tualchhunga hri kai ve ve an ni a; tualchhunga hri káite hi an kàina hriat a nih loh bâkah, pakhat zawkin Covid-19 symptom a nei.

January 30, Inrinni khan ZMC laboratory-ah swab sample 283, TrueNAT-PCR hmangin district pali-ah sample 55 leh RAT hmangin district pasarihah sample 870 endik a ni a; sample endik zawng zawng chu 1,208 niin, chu'ng aṭanga Covid-19 vei hmuh chhuah mi paruk chu 0.50% a ni.

Hripui vei Inrinnia hmuh chhuah mi parukte chu tualchhunga hri kai panga leh tun hnaia Bagha-a kal pakhat an ni a; tualchhunga hri kái zinga mi pali chu an kàina hriat a ni lo a, symptom nei lo vek an ni.

January 30, 2021 thlenga Mizorama swab sample endik tawh zat chu 2,07,184 a ni a, chu'ng aṭanga Covid-19 positive mi 4,372 chu 2.11% a ni. Hripui vei hmuh tawh zinga mi 2,069 chu Mizoram chhunga kái an ni a, mi 2,303 chu Mizoram páwn aṭanga an rawn luh hnua hmuh chhuah an ni thung.

Hnahthial district - 1: Hnam dang kum 48 mi, Sadguru Constructions hnuaia thawk, tun hnaia state pawn aṭanga rawn lut, inkhung hrang mek, symptom nei lo.

Bawngkawn - 2: Mipa kum 55 leh hmeichhia kum 52, nupa; private hospital pakhata inentir tura an kalnaa hmuh chhuah, hri kaina hriat loh, nu zawk symptom nei.

Ramhlun North - 4: Mipa kum 12, 43 & 82 leh hmeichhia kum 52, chhungkaw khata chêng. Kum 82 hi private hospital-a inentir tura a kalnaa hmuh chhuah; hri kàina hriat loh leh symptom nei lo vek.

Zuangtui - 1: Mipa kum 34, private hospital-a damlo a hruai aṭanga kái nia hriat, symptom nei lo.

Vairengte - 1: Hmeichhia kum 16, tun hnaia Bagha bazara kal, symptom nei lo.