ZPM Ṭhalaiin street campaign buatsaih

ZPM Ṭhalai chuan January 30, Inrinni khan Aizawl khawpuia hmun hrang hrangah street campaign an buatsaih a, ZPM leh an ṭhalai lama hruaitu hrang hrangte'n thu an sawi.

ZPM ṭhalaite'n street campaign an huaihawt­nate chu - College Veng, Bethlehem Vengthlang, Bethlehem Veng, Chite, Armed Veng, Armed Veng South, Tuithiang, ITI Veng, Salem Veng, Mission Veng, Mission Vengthlang, Nursery, Maubawk leh Khatlaahte a ni a; an party star campaigner TBC Lalvenchhunga leh B Lalchhanzova te bakah, AMC-a an candidate-te'n thu an sawi a ni.

TBC Lalvenchhunga chuan, ZPM-in AMC-ah sorkarna an chan chuan kalphung thar hnuaiah rorel a ni dawn tih sawiin, "Mipui mamawh leh hmasawnna tur dan siam a ni ang a, mipui harsatna thlentu dan paih niin, rorelna ṭha siam a ni ang," a ti. 

AMC-ah state sorkara rorel laite chu roreltu ni lo mah se AMC sum hmuh tur leh a hmuh danah danglamna a awm lo tih sawiin Lalvenchhunga chuan, "Sorkar hian a duh zawng tiam loin, kan duh záwng hi sorkar min tiam turin i nawr ve ngam tawh ang u," a ti a; party dangte chu thil ṭha leh dik ti turin huaisenna an neih loh thu a sawi.

B Lalchhanzova chuan, "Ei zawn awlsam zâwkna Aizawl din tharin, rethei leh dinhmun ṭha zawkte indîpdâl loa lungmuang taka kan chên tlàn theihna khawpui i din ang u," a ti a; hmeichhia, naupang leh kum upate thlamuanna Aizawl thar siam turin Aizawl mipui a sáwm a ni.