Hnahthial College-a in thar 3 hawng

Higher & Technical Education (HTE) minister Dr R Lalthangliana chuan January 30, Inrinni khan Hnahthial College-a RUSA hnuaia in sak pathum leh Hnahthial district Skill Development Programme a hawng. Skill Development Programme atana in­kaihhruaina brochure a tlangzarh bawk.

Dr R Lalthangliana chuan, RUSA kaltlanga Hnah­thial College-in in thar a nei chu lawmawm a tih thu sawiin, "In ṭha neih hi thil lawmawm tak a nih rualin, a nihna tur taka kan hman ṭangkai loh chuan a ho thlawn mai dawn a ni," a ti.

HTE Minister chuan, ziak leh chhiar thiam tamna state nih chu a hlut thu a sawi rualin, "Hei hi kan ram hmasawnna leh hlawhtlinna tehfung, innghahna atan a hmantlak loh tih kan hun tawngin a hril chiang tawh a, thiamna chi hrang hrang ṭai darh zawnga inzirtirna kalpui a pawimawh," a ti.

HTE Board vice chairman Dr Vanlalṭanpuia, MLA pawhin thu sawiin, "Zirna kalphung pangngaiin hna min pe vek séng tawh lo a, hna min pek theih pawh a tlem telh telh avang leh private enterprise an len telh telh avangin MYC chuan sorkar hna piah lamah hna chi hrang hrang thawk thei tura ṭhalaite chher chhuah a ngai pawimawh a ni," a ti a; thiamna bik nei chi hrang hrang mamawhna a nasat zel dawn thu a sawi.

RUSA 2.0 hnuaia Upgradation of Existing College to Model Degree College component hnuaiah cheng nuai 400 hmuh a ni a; chuta ṭang chuan cheng nuai 295 hmangin Mizoram Technocrats company-in Hnahthial College academic building block, library building leh administrative building zauh hna an thawk a ni.

Hnahthial College hi August 20, 1979-a din a ni a, zirtirtu 29, non-teaching staff pakua leh zirlai 135 an awm a; department paruk - English, Mizo, Education, Economics, Political Science leh Geography-te a awm. NAAC Grade-C (CGPA 1.87) a ni mek.

Hnahthial district skill development programme bul ṭanna atan MYC chuan Rs. 9,00,000 a pe a, February 4 - March 20, 2021 chhungin ṭhalai mi 30 tan mistiri training leh February 15 - March 1 chhungin mi 20 hnenah ar vulh training neih a ni ang. Thiamna chi hrang hrang 13 training pek lehna tur ruahman a ni.