MNF sorkarah mipui an beidawng - MPCC Treasurer

Congress party chuan Inrinni khan Vaivakawn, Bethlehem Veng­thlang leh Electric Vengah AMC inthlan campaign hawnna an buatsaih a; MPCC treasurer Zodin­tluanga Ralte, MLA chuan, MNF sorkarah mipui an beidawng niin a sawi. 

Zodintluanga Ralte chuan, kum 2018-ah mipuiin beiseina sang tak neiin Congress sorkar an thlâk tih sawiin, "Mipui beiseina anga inchhál MNF sorkarah mipui beidawnna a thlen nasat tâk êm avangin Aizawl leh Mizoram mipuiin Congress party chu Mizoram tana hmasawnna hna thawka thlamuan turin an nghak a ni. Aizawl khawpui leh Mizoram mipuiin Congress party-ah beiseina an nghat," a ti. 

MNF sorkar apiangin mipui manganna a thleng ziah nia sawiin Zodintluanga chuan, "Hmânah ram a buai a, thisen a luang a, a hnua an sorkarah ṭàm a tla zui a ni. Tuna an sorkarah sum an enkawl thiam loh avangin sorkar hnathawkte'n hlawh an la thei lo," a ti a; kum 2018-a MNF sorkar hnuah Mizorama tualthah thlen nasat ber kum a thleng tih a sawi.

MPCC Treasurer chuan, MNF sorkar laia AMC din tuma hmalak ni mah se, tihhlawhtlin tum loin an term an hmang a, Congress party-in a takin an din tih sawiin, "AMC tichangtlungin, corporation-ah kan hlângkai leh a, an zawh tâwk zelin AMC chu tihlena tihhmasawn a ni," a ti a; AMC-ah sorkarna an siam chuan, mipui tibuaitu ni loin, an harsatna sutkianpuitu AMC an siam tur thu a sawi a ni.

Zodintluanga Ralte chuan, Chief Minister-in May 2019-ah Assam Rifles sawn chhuah a nih tur thu a sawi nia sawiin, "Tun thlengin an la chhuak lo. Tunah Febuary 2021-ah an chhuak dawn, a ti leh tawh. Sport Minister lahin ramri buai chingfel tawh anga a insawi ve leh ngawt hi a zui ṭhin mi pakhat thusawi ang maia nuihzatthlak a ni," a ti.

Congress MLA Lalrindika Ralte pawhin thu sawiin, sawi chiam aiin a taka thawh a hlâwk zawk tih a sawi a, "Pathianin mihring a din chhan leh hruaitu a ruat chhan chu mi dangte rawngbawlsaktu atan a ni. Thil ṭha beiseina avanga politics-a insawichhiatna a thlen pawhin dawhtheihna avangin a fel ṭhin," a ti. AMC-ah an hmathlirte a taka hlen chhuak theitu tur candidate an neih thu a sawi bawk.