Mihringin bird flu an kái thei; Mihringah inkài chhâwng thei lo

AH&Veterinary department hotute chuan, Avian Influenza (Bird Flu) léng vangin arsa leh artui ei a hlauhawm loh thu leh, he natna hi mihringin kài theih ni mah se, kài a harsat thu an sawi.

Avian flu (Bird flu) chungchanga puan­zar ngaite AH&Vety aiawha puang­zartu Dr Lalhmingthanga, joint director (Livestock Health) chuan Vanglaini palai zawhna chhángin, India rama state 12-ah bird flu chi hnih H5N1 leh H5N8 a lên thu a sawi a, "H5N1 hi mihringin an kài theih chi a ni a, a kái zinga 60%-in an thihpui tawh. Mahse, India ramah mihringa kái an awm hriat a la ni lo. H5N8 erawh hi chu mihring tan a hlauhawm loh a, ár lam chi tan a hlauhawm thung," a ti.

Dr Lalhmingthanga chuan, "Virus hi centigrade degree 70-a sáah a thih vek theih avangin arsa leh artuite kan chhuang hmin ṭha ang a, a hela ei loh tur a ni," a ti a; mihringin kái thei mah se awlsam taka kài theih a ni lo a, ar nen hnai taka rei tak inchenchilh aṭanga kai theih a nih thu leh mihring leh mihringah inkài chhàwn theih a nih loh thu a sawi.

Mizoramah bird flu a luh palh pawha hmachhawn turin an inbuatsaih thu sawiin Lalhmingthanga chuan, "State Rapid response Team kan siam a, hemi atana motor bik tur leh PPE-te kan ruahman tawh a, disinfectant pawh kan lei belh mek a ni," a ti.

Dr Lalhmingthanga chuan, bird flu vanga ar leh sava lam an thih chuan, a thihna hmun aṭanga km. 10 bial chhungah hmalak a ngaih thu a sawi a, "Km. 1 bial chhunga ár lam chi zawng zawng chu suat vek a ni ang a, km. 10 bial chhungah surveillance zone neih leh a ni ang," a ti. Chhan hriat loha ar leh sava thite chu kut lâwnga khawih lo tur leh AH&Vety department-ah hriattir zel turin mipui a ngen.

AH&Vety department chuan, Avian Influenza (bird flu) chungchangah hian kar hmasa khan thuchhuah an siam a; an hriatpuina leh phalna nei tan chauh ar, ar notê, artui leh ar chawte Mizoram páwn aṭanga lâk luh phal a ni.