Serchhip MJA-in Inkhawmpui an hmang

MJA, Serchhip Dis­trict chuan January 30, Inrinni khan Serchhip Press Club-ah General Conference an hmang a, Serchhip bawrhsap Kumar Abhishek leh MJA Gen.Hqrs president Zonunsanga Khiangte ten an hmanpui.

Inkhawmpui hi Serchhip MJA vice pre­sident C Rameng­mawia'n a kaihruai a; Serchhip DC chuan, jour­nalist-te chu democracy-ah hna pawimawh tak thawk an ni tih sawiin, "Mipui leh sorkar thlun zawmtu pawimawh an ni. Sorkar hmalaknate mipui hriat tura an puan chhuah bakah, khawtlang mipui harsatna leh mamawhte an zir a ni," a ti a, democracy ramah media chak, zalên leh tih bik nei lo a awm loh chuan democracy-in awmzia a neih loh thu a sawi. 

MJA president Zonun­sanga Khiangte chuan, Serchhip MJA-te'n Covid-19 léng chunga project site visit an nei thei ṭhin chu lawmawm a tih thu a sawi a, "Project site visit hi uar zel a ṭha. Hei hian hmasawnna hna thawh a tikal chak a, hna­thawh langtlang a siam. Tunlaiah smartphone kan hmang nasa tawh a, thil chhiar nan pawh kan hmang nasa, mahse, print chhuah ngei chhiar chu hriatna a nghet bik a, chuvangin, lehkha chhiar kan uar thar a ṭul," a ti. 

Conference-ah hian chawhnu lamah Serchhip MJA president Kapliana Pachuau kaihhruaiin rorel a ni. Serchhip district-ah hian MJA member 14 an awm mek.