Khawthlir

Inrinni khan MTP, Tuisih branch chuan Siaha District Hospital-ah thisen unit 22 an pe a, petute mipa 20 leh hmeichhia pahnih an ni a; ṬKP, Lawngtlai College Veng unit-in District Hospital tan unit 17 pein, petute mipa 12 leh hmeichhia panga an ni. Civil Hospital, Aizawlah Ecentric Solutions-in unit 16 pein, mipa 13 leh hmeichhia pathum an ni a; KṬP, Phunchawng Branch-in Synod Hospital tan unit 10 an pe a, petute mipa pakua leh hmeichhia pakhat an ni. 

Nimin tlai dar 5 dinhmun angin, State Referral Hospital-ah Covid-19 vei mi pariat an awm mek a, an zinga pakhat chu Inrinni tlai khan ICU-ah dah luh niin, mi dang zawng Isolation ward-ah an awm. SRH-ZMC Bulletin tarlan danin, ICU-a awm chu oxygen nen enkawl mek a ni a, Isolation ward-a awm zingah oxygen pek mek pakhat a awm bawk. Mi pariat zingah hian kum 60 chung lam leh naupang pakhat ve ve an tel. ZMC-ah hian nimin khan swab sample endik a ni lo. 

Kolasib-a Scouts and Guides leh State Headquarters Rover-te chuan ni hnih awh hiking an buatsaih a, January 29, Zirtawpni khan Maj. Carolyne Zonunmawii Pachuau, District Scouts & Guides vice president-in a hawng. Hiking hi Bairabi-a neih tur a ni.

Nimin chhun dar 12 vel khan Ailawng rama Film City atana siam Zokhuaa in sak 16 chu a kâng vek. In hi hâl a nih rin a ni a, he thu ziah lai thleng hian a hâltu hriat a la ni lo.

Hemi chungchangah hian Mizoram Film Forum chairman Lalawmpuia Khiangte-in Kulikawn Police Station-ah FIR a thehlut a ni.

UPC (NEI), Aizawl East District hnuaia pastor bial hrang hrangte chuan nimin khan Bial PYD Inkhawmpui an hmang. Inkhawmpui hi ruahman lâwk dan chuan January 29-31 chhunga neih tur a ni a, Covid-19 léng vanga kum dang anga hman theih a nih loh avangin bial tinin rorel inkhawm chauh an nei a ni.