ZPM thli a tleh zel - ZPM Vice President

ZPM party hruaitute chuan January 30, Inrinni khan AMC Ward-XV ah inthlan atana an inbuatsaih dan an enfiah a; ZPM vice president Lalthansanga chuan Aizawl leh Mizoramah ZPM thli a tleh zel niin a sawi.

Lalthansanga chuan, MNF-te chuan hnam movement an kalsan tawh a, 'Pathian leh kan ram tan' titu niin insawi mah se, hnam an phatsan mek tih a sawi a, "Mizoram hmun hrang hrangah ZPM thli a tleh zel. MNF hian ramri an humhim ngam lo a, tun thlengin ram chin tifel loin an la awm reng. Hetiang hi an nih avangin mipuite'n zawm tlak a ni lo tih an hria a, ZPM-ah kan lo kuangkuah khâwm zel a ni," a ti.

ZPM Vice President chuan, AMC thar din an tum thu sawiin, "Term liam taa MNF sorkarah khan kalphung mumal a awm lo. Keini chuan tlachawp rorela kalte ang ni loin, kalphung thar nen mumal takin kan kalpui dawn. AMC-ah kan khingpuite'n candidate ṭha tak tak an nei a, mahse, an party hruaitute an fuh loh avangin ropui taka kal ngaihna a awm lo," a ti a; hruaitu ṭha leh a ngaihna hria neitu ZPM candidate-te chu kalphung thar siam turin thlan tlin ngei a ṭul thu a sawi.

MNF-in ZPM leader Lalduh­oma an bei nasa tih sawiin Lalthansanga chuan, "MLA aṭangin dik lo takin an bân a ni. MNF hian an hlíngpui chu an khei chhuak ngei a, mahse, anmahni kaihza thâ hi an chhat tel a ni," a ti.

Aizawl West-III bialtu MLA VL Zaithanzama pawhin thu sawiin, "MNF thil tih leh thusawi apiang a fuh lo zel mai hi a mak hle. Pu Lalduhoma chanchin hi an sawi thiam tâwk a ni mai a, an tuipui em em ringawt. Kum 2018 MLA inthlan ai khan nasa takin veng tinah ZPM-in hma kan sawn a, unit din mumal lohnaah mumal takin a ding tawh," a ti a; AMC thar turah hian ZPM a sorkar ngei tur thu a sawi bawk.