Minister-in Zophaia IR hmun a tlawh

Minister of state K Lalrinliana chuan January 30 khan Zophaia Indian Reserved (IR) police post a tlawh a; ramri tihhmasawn nan hmalak dan tur leh NH-154 aṭanga Zophai IR duty post inkalpawhna lei siam mek a endik.

K Lalrinliana chuan IR duty post-a thawktute kâwmin, "Mizoram mi leh sa, leilet neitute'n thlamuang taka an leilet an enkawl chhunzawm zel theih nan patrolling uar lehzualin kalpui ang che u," a ti a; Zophai chu ramri hnaia awmte thlamuantu an nih angin, an veivahna turin lirthei an kawl ngei a ṭul thu leh chumi tur chuan a ṭul anga hma a lâk tur thu a sawi. Ramri tihhmasawn nan sorkarin ruahmanna hrang hrang a siam tawh niin a sawi bawk.

Minister hian Zophaia IR post leh Assam police outpost, Golachhera inkara leilet awmte chu a hmunah a endik a; ramri tihhmasawnna tura hmalakna hmasa atan agriculture link road kalna tur leh Ramri luia êng chhitna kaltir dan tur a en nghal a ni.

Zophaia IR post-a awmte'n ceiling fan leh cooler an mamawh thu an lo thlen angin, K Lalrinliana chuan a leina tur Rs. 30,000 leh ṭul danga hman tur Rs. 10,000 a pe a ni.