Siahaah MYC Coaching Centre hawng

Mizoram Youth Com­mission (MYC) chair­man Dr Vanlalṭanpuia, MLA chuan January 30 khan Siaha DRDA conference hall-ah MYC Coaching Centre a hawng.

Dr Vanlalṭanpuia chuan, "Competetive exam-ah chuan Siaha district hi Mizoramah in duai lo hle a, coaching centre hi in phu ve rêng a ni. Centre kan hawn aṭang hi chuan Siaha district aṭangin IAS leh central service dang bakah, NEET leh SMATEE-ahte hlawhtlinna nasa taka in chan ngei ka beisei," a ti.

IAS-ah Mizo ṭhalai a tam thei ang ber tling se an duh thu sawiin Vanlalṭanpuia chuan, "UPSC coaching pawh kan ti duh lo, IAS coaching kan ti mai ṭhin. A chhan chu, kum 2014 aṭang khan Mizoram aṭangin IAS-ah kan inziak tling tawh lo a ni," a ti a; Mizoram aṭanga IAS-a tling awmtir chu MYC thil tum lian tak a nih thu a sawi.