Award dawn Serchhipah lâwm

Poshan Abhiyaan hnuaia ICDS Mizoramin national award leh ICDS-CAS Implementation Award a lak chu February 21, 2020 khan Serchhip P&E Veng YMA Hall-ah lawm a ni a, district bawrhsap Dr Lalzirmawia Chhangte-in a hmanpui.

Dr Lalzirmawia Chhangte chuan, national award an dawng thei chu lawm­awm a tih thu a sawi a,"ram puma thawktute zawng zawng inpekna rah a ni," tiin, India ram chu Welfare State a nih thu leh sorkarin mipuite hamṭhatna atan kawng hrang hrangah hma lain ruahmanna a siam thute, hetiang ang ram hi an awm loh thute a sawi bawk.

Poshan Abhiyaan district coordinator James Lalremliana leh PMMVY district coordinator F Hmingthanmawii ten an hmalaknate an sawifiah a; Ser­chhip SP R Sathiyasundaram, Serchhip BDO Vanlalhmachhuana, khawtlang hruaitute leh ICDS Ser­chhip Project-a thawkte an tel.

Poshan Abhiyaan (National Nutrition Mission) hi India ramah kum 2018 aṭangin kalpui a ni a, Mizoramah chuan kum 2019-ah kalpui ṭan a ni. Kum tin award sem ṭhin a ni a, kawng hrang hranga thawk ṭha state-te chu lawmman atan thuchei leh Rs. 1,500,000 pek ṭhin a ni.