Mizorama Governor nghet dah turin Speaker-in PM-ah ngenna thlen dawn

Vanglaini palai zawhna chhangin Lalrinliana Sailo chuan, President hnen aṭangin chhanna a la dawn loh thu sawiin, "Prime Minister hnenah Governor nghet dah tura ngenna ka thawn leh dawn a, ka lehkha thawn tur pawh ka tifel vek tawh," a ti.

Speaker hian hun eng emaw chen Mizoramin Governor nghet  a neih tawh loh avangin President hnenah ziakin Governor nghet dah tura ngenna hi a thawn a ni. Mizoram Governor Kum­manam Rajasekharan chu kumina Lok Sabha inthlan chuh a tum avangin March, 2019 khan a bang a, sorkar laipui chuan Mizoram hmui turin Assam Governor Prof. Jagdish Mukhi a ruat.

Prof. Jagdish Mukhi hi March 9, 2019 khan Raj Bhavan-ah Gauhati High Court judge Nelson Sailo-in rinawmna thu tiamtirin Mizoram Governor atan a la lut a, tun thlengin Larsap nghet nei loin Mizoram hi a awm a ni. Hetih lai hian speaker Lalrinliana Sailo chuan, khua leh tui dik takte chhinchhiahna tur March 18, 2019-a Assembly session-in a pass tawh, 'The Mizoram Maintenance of Household Registers Bill, 2019' chungchang chu Governor sawipui a tum tih a sawi.

Zawhna chhangin Speaker chuan, The Mizoram Maintenance of Household Registers Bill chungchangah Governor aṭangin thu dawn a la nei lo tih a sawi a, "Governor hi ka be dawn a, Bill chungchang hi ka sawipui ang. Indian Constitution-ah Assembly House-a bill pass Governor hnena pawmpui tura thawn buaipui a nih dan tur ziah vek a ni," a ti.

Speaker sawi danin, Governor hian Assembly House-a bill pass, pawmpui tura state sorkarin a thawnah kawng chi liin thutlukna a siam thei. Chu'ngte chu - pawmpui (assent), pawmpuina pek loh (withhold assent), President pawmpui tura dah leh, state sorkara ngaihtuah ṭha leh tura thawn a ni.

The Mizo­ram Maintenance of Household Registers Bill, 2019 hi nimin thleng khan Governor-in a la pawm lo a,  state sorkarah eng thu a mah a la hriattir lo.