Governor-in Social Welfare hotute a kâwm
Governor Prof. Jagdish Mukhi chuan nimin khan Raj Bhavan-ah Social Wefare & Tribal Affairs (SWTA) department leh Women and Child Development (WCD) department hotute a kâwm.
Tribal-te hmasawnna leh hamṭhatna kaihhnawih thila Chhattisgarh, Odisha, Mizoram, Meghalaya, Assam leh Tripura governor-te'n Sub-Group meeting, Delhi-a September thla chhunga neih huna thu thlen turte an sawiho.
Prof. Jagdish Mukhi chuan, tribal-te hamṭhatna leh hmasawnna chungchangah meeting neih a nih tur thu sawiin, SWTA leh WCD department hotute chu meeting agenda kaihhnawih thila an hmalaknate a zâwt a; official-te chuan Mizorama tribal-te puala hmalakna leh hamṭhatna hrang hrangte a lem nen an hrilhfiah.
Governor Sub-Group meeting hi a pawimawh avangin, nimina department hotu koh zinga tel lo, tribal kaihhnawiha hmalakna nei department dangte pawh thu pawimawh an thlen duhte chu Governor Secretariat-ah thlen thuai turin Larsap chuan a hriattir nghal a ni.
Sorkar thuchhuah tarlan danin, tribal awm tamna deuh state governor-te'n Delhi-a meeting an neih turah hian 5th Schedule hnuaia inrêlbâwlna dan, Tribal Advisory Committee Council din chungchang, Integrated Tribal Development Agency/Modified Area Development Agency (ITDA/MADA) tihchangtlun, tribal culture danglam bikna vawn ṭhat, tribal bial chhunga special residential school din, tualchhung mite ráwn chunga hmalakna kalpui, mining policy leh thil dang pawimawhte sawiho a ni ang.
Nimina Larsap Jagdish Mukhi hoa meeting-ah hian hun a teptêr tawh avangin tribal kaihhnawih department SWTA leh WCD hotute chiah koh an ni a; secretary to governor K Lalthawmmawia, WCD director Vanlalpianpuii, SWTA director Aileen Vanlalzawni leh official dangte an tel.