Memorandum thehluh kan hriatpui lo - MBDPF

Mizoram Bru Displaced People Forum (MBDPF) hruaitute chuan, Bharat Hitaraksha Abhiyan (BHA) intite'n Bru-te tana chief minister Zoramthanga hnena memorandum an thehluh chu an hriatpui loh thu an sawi.

Vanglaini palai zawhna chhang­in MBDPF president A Sawibung chuan, BHA-te thil tih dan chu an hriatpui loh thu a sawi a, "An hnenah engmah thlen kan nei lo a, anni lam pawhin engmah kan hnenah thlen an nei chuang lo," a ti.

Bharat Hitaraksha Abhyian (BHA)-te hian tun hnai khan Tripura-a Bru refugee camp an tlawh a; chumi chungchangah A Sawibung chuan, an camp dinhmun an zir chiang ni maia an ngaih thu a sawi. BHA-te hian Bru camp an tlawh hnuah Mizoram an pan a, Chief Minister hnenah Bru refugee camp-a awm mekte Mizorama an kîr hunah ram hectare 5 tal pe tur leh chhungkaw 500 aia tlem loa awm khawmtir tura an ngenna an pe a ni. BHA zingah hian MP-te pawh an tel nia hriat a ni.