Zirlaite elementary aṭangin tum mumal neia lehkha zirtira kaihhruai a ṭul - Education Minister

Science Teachers’ Asso­ciation, Mizoram (STAM) chuan nimin khan Synod Conference Centre-ah General Con­ference vawi 34-na an hmang. Khuallian, School Education minis­ter Lalchhandama Ralte chuan, zirlaite chu ele­men­tary level aṭangin tum mumal neia lehkha zirtira kaihhruai a ṭul thu a sawi.

Minister Lalchhan­dama chuan, "Zirlaite hi elementary level aṭangin tum mumal neia lehkha kan zirtira kan kaihhruai a ṭul a, central service leh all India service-ahte tam zawk kan tlin theih nan a bulṭhut aṭanga tum mumal neia zirna kalpui turin kan puanvente sâwi chhíng ila, kan theihpatawp kan chhuah chuan kan hlawh­tling ngei ngei ang," tiin STAM member-te a fuih.

Lalchhandama Ralte chuan, STAM chu kawng hrang hranga sorkar finchhuahtu leh ṭanpuitu a ni tih sawiin, "Lawmman awm miah si loa kan ram rohlu, zirlai naupangte chawikanna atana châwl loa thawktu, pawl ropui leh ngaihsanawm a ni," a ti a; naupangte zirna piah lama an nun kaihruai thei tur, an hma lam hun kawhhmuhna ni bawk Mizoram Science Journal an chhuah reng thei chu fakawm a tih thu a sawi.

Minister chuan, ram pum huap Children Science Congress-ahte Mizote project a lan phâk theih nan zirtirtute'n ṭan an lâk thar a ṭul thute sawiin, "Mizo thluak a ṭha kan tih rualin, ram pum huap inelna - NEET, JEE leh technical entrance exam dangah kan dinhmunin duhthu a sâm tawk lo a, a chhan beng sika kan ngaihtuah a ṭul. Zirtirtu leh nu leh pate lam pawhin kan zirlai te, kan tu leh fate hmakhua ngai leh zual a, tum mumal nei chunga lehkha kan zirtir a ṭul," a ti.

STAM conference hi thawh hniha ṭhen a ni a, chawhmaah conference hawnna leh Mizoram Science Journal Award an sem. Chawhnu lamah poly­thene chungchang zirho a ni a, resource person chu Aizawl Municipal Corporation commissioner Dr H Lalthlangliana a ni.

Rorel inkhawm an nei a; an rorel zingah - technical entrance exam hrang hrangah Mizo zirlaite’n tun aia an tih ṭhat zawk theih nana hmalak te, NIT-Mizoram tihchangtlun leh Mizo zirlai tam zawk an luh theih dan tur te, Mizoramin central pool hnuaia MBBS quota a neih ṭhin kumina tihtawp tâk chu nei lêt tura sorkara thlen chungchangte a tel.

STAM hi kum 1986-ah din a ni a, member 500 vel an awm mek a ni.