Damdawi-in OPD hawn hun Zâwm turin doctor-te hriattir an ni

Health & Family Welfare department chuan sorkar dam­dawi-ina out patient department (OPD)-a doctor-te ṭhut hun chungchangah September 11, 2019 khan hriattirna (order) a chhuah thar a; OPD hun (hour) chu zawm ngei tura doctor-te hriattirin, zâwm lote chungah action lâk a nih tur thu a tarlang.

Health department order-a a lan danin, damdawi-in OPD-a doctor-te awm hun chhung chu zing dar 9 aṭanga tlai dar 3 thleng a ni a; OPD card pek chhuah hun chu zing dar 9 aṭanga chawhnu dar 1 thleng niin, OPD card, a hlui leh thar, registration number nei tawh reng reng chu reject (hnâwl) loh tur a ni.

OPD working hour-in a huamte chu State Referral Hospital, Kulikawn Hospital, Mizoram State Cancer Institute leh district hospital zawng zawng a ni a, "Department tinte'n 2nd Saturday (thla tin Inrinni vawi hnihna) tih loah chuan OPD an hawng vek tur a ni. 2nd Saturday-ah OPD khar ṭhin a ni a, Saturday dangah chuan working hour pangngai zawm tur a ni," tih a ni.

Order tharah chuan, "He Order hi OPD doctor duty zawng zawngte'n zawm nghal vek tur a ni a, a zâwm lote chungah dan anga action lak zel tur a ni," a ti bawk.