KHAWTHLIR

Rashtriya Poshan Abhiyan (National Nutrition Mission) hnuaia Rashtriya Poshan Maah (National Nutrition Month) chungchanga Champhai district level Convergence Committee chu nimin khan an chairman Dr Naveen Aggarwal, district bawrhsap hoin DC conference hall-ah an ṭhukhawm a; Poshan Maah kalpui mek leh kal zel dan tur an sawiho. 

Mamita UDPA department leh Mobile Medical Unit (MMU) chuan Deendayal Antyodaya Yojana - National Urban Livelihood Mission (DAY-NULM) hnuaiah September 11, Nilaini khan Mamit Hmarvengah Swasth SHG Pariwar (100 days activities) hmangin free clinic an buatsaih. He free clinic hi self help group (SHG) member-te leh an chhung­te leh, BPL member-te tana buatsaih a ni a, damdawi mamawhte a thlawnin an pe a ni.

GoAir chuan Guwahati leh Aizawl (Lengpui Airport) inkara thlâwk turin an website-ah ticket book theih turin a dah tawh. September thla tir lama Mizoram sorkar thuchhuah chuan, GoAir hian October 4, 2019 aṭangin Aizawl leh Guwahati inkarah thlawhtheihna a thlawhtir ṭan dawn thu a lo tarlang tawh a ni. GoAir website-a a lan danin, Aizawl-Guwahati thlawhna chuan man chu Rs. 6,724 a ni.

Mizoram University Students’ Council Discussion Forum (MZUSCDF) leh MZU Incubation Centre chuan nimin khan MZU Auditorium-ah 'Entrepreneurship - Starting Startups Programme' an buatsaih a, vice chancellor Prof. KRS Sambasiva Rao khuallian niin, Planning secretary Dr C Vanlalramsanga khualzahawm a ni. MZU Incubation Centre coordinator Dr Laldinliana Varte leh Zonu Meat Processing director Dr Vanlalramhlimpuii ten thupui an sawi.

State level Steering Committee for Celebration of Páwl Kût chu nimin khan an chairman Dr K Beichhua, Social Welfare & Tribal Affairs minister kaihhruaiin Secretariat conference hall-ah an ṭhukhawm a, kumin November thlaa Páwl Kût hman tur an thlirho. Ruahman dan chuan, Páwl Kût hi Mizorama district headquarters zawng zawngah November 13-15, 2019 chhunga lawm tura tih a ni.