Lunglei district-ah kum 2018-2019 Chhungin vaihlo vangin mi 39 man
Lunglei district Anti-Tobacco Squad (ATS) chuan kum 2018-19 chhung khan vaihlo khuahkhirhna dan bawhchhia mi 39 an man a, sikul 70-ah awareness campaign an nei. Serchhip District Anti-Tobbacco Squad (ATS) chuan kum 2018-19 leh 2019-20 chhungin phal lohna hmuna mei zu mi 199 an man.
September 11, Nilainia Lunglei District Tobacco Control Cell leh Higher and Technical Institute Mizoram (HATIM) NSS-te'n HATIM Auditorium-a Mizoram Anti-Tobacco Day vawi 6-na an hmannaa report danin, kum 2018-19 chhung khan Lunglei ATS chuan Lunglei khawpuiah squad drive vawi 67 an nei a, dan bawhchhia mi 39 an man. Kum kal mek 2019-20 chhungah chuan squad drive vawi 30 neihah mi 14 an man tawh a ni.
Lunglei Tobacco Cessation Clinic-a consultant Dr Lalnunsiama Renthlei-in a tarlan danin, Lunglei ATS chuan kum 2018-19 chhung khan sikul 70-ah awareness campaign an buatsaih a, vaihlo sim 19.94% an awm. Kum 2019-20 ah chuan sikul 66-ah awareness campaign an buatsaih tawh a, vaihlo sim rate chu 22.25% a tling tawh. Kum 2018 July thla aṭanga kumin August thla thlengin vaihlo zuk leh hmuam sim tuma inentir mi 5,614 an awm bawk.
HATIM Auditorium-a Anti Tobacco Day hmannaah hian district bawrhsap K Lalrinzuali chu khuallian a ni a; Bawrhsap chuan, vaihloin mihring taksaah natna tam tak - chuap ṭha lo, thawhah, cancer leh natna hrang hrang a thlen bakah, mihring a tichêpin a tizalên lo tih a sawi a, zirlaite chu vaihlo laka inthiar fihlim turin a fuih. Inkhawm zawhah dan loa zawrh meizial (cigarette) man tawh sate an tichhe nghal a ni.