MJA President-in Bharti Gas a tlangzarh

Nimin khan The Grand Hotel-ah MJA president Zonunsanga Khiangte chuan Mizorama kalpui ṭan turin Bharti Gas a tlangzarh.

MJA President chuan, Bharti Gas tlangzarh a ni ta chu Mizoramin eirawngbawlna gas lama bung thar a kaina a nih thu sawiin, "Mizoramin eirawngbawlna gas lama kan mamawh chu service ṭha, a hun taka consumer-te hnena pek leh tih chingpen loha mipuite hnen thlentirte a ni," a ti.

Service a ṭhat chuan Bharti Gas chuan consumer tam tak an neih a rin thu sawiin Zonunsanga Khiangte chuan, "In service a ṭhat loh erawh chuan Mizo mipui leh journalist ngeite tan pawh hmelma an ni zawk thei," a ti a; Bharti Gas-in service ṭha an pek chuan Mizo mipuite indaih lohna phuhrûkna ṭha tak a nih tur thu a sawi.

Bharti Gas neitu 16 LPG Bottling Plant general manager Pankaj Kumar Borah chuan, Mizoram mipui mamawh phuhrûk ngei an tum thu sawiin, "Bharti Gas hi indaih lohna a awm lo ang. Connection awlsam taka tih theih a ni dawn a, cashless pawhin a lei theih ang. Home delivery awlsam zawka kalpui a nih theih nan gas bûr zâng zawk siam tum a ni. Kan gas hi tihchingpen a ni ve lo ang tih ka tiam che u," a ti.

Pankaj Kumar sawi danin, Bharti Gas hian domestic cy­linder kg. 15.6 leh commercial cylinder kg. 21 an nei a, a búr tê chi - kg. 4 leh kg. 6 cylinder pawh siam thuai an tum a ni.