Congress hunlaia hmalakna EDS MNF sorkarin a kalpui zui zel dawn
Congress sorkar policy, New Economic Develoment Policy (NEDP) hnuaia kalpui Entrepreneurship Development Scheme (EDS) chu MNF party kaihhruai Mizoram sorkarin a kalpui zel dawn.
Planning department hotute hnen aṭanga thu dawn danin, chief minister Zoramthanga'n EDS kalpui chhunzawm zel a remti tawh a; EDS hnuaiah hian inelna (Micro Startup Capital Competition leh Mizoram Rahbi) hmanga sorkarin ṭanpuina dawng tura a thlan chhuah pawisa la pek kim loh eng emaw zat an awm a, chu'ngte chu pawisa pek chhunzawm an ni dawn.
EDS hnuaia Micro Startup Capital Competition leh Mizoram Rahbi hmangin miin project an siamte an thehlut ṭhin a, chuta ṭang chuan ṭanpuina dawng tur thlan
ṭhin a ni. Congress sorkar lai khan ṭum hnih project hmanga inelna buatsaih a ni tawh.
Inelna ṭum khat buatsaihnaa thlan chhuahte chuan ṭanpuina an dawn tur ang an dawng kim tawh a, a ṭum hnihnaa thlan chhuah zingah erawh ṭanpuina dawng kim lo an la awm inel vawi thumnaah erawh Congress sorkar laiin ṭanpuina dawng tur thlan hman a ni lo a, project thehlutte zinga power point presentation ti tlaka ngaihte chu MNF sorkar hnuaah presentation pe tura koh an ni.
NEDP sum hmanga hmasawnna hna thawhte chu chhunzawm zel a ni a, chutih laiin, NEDP hnuaia contract hna pek chhuah tawh eng emaw zat chu MNF sorkar tharin a titawp (stay) rih thung.
NEDP hnuaia hna stay-te chungchangah hian sorkar chuan tun hnai khan notification a tichhuak a; hna stay mekte chu a kaihhnawih minister ruahmannaa kalpui chhunzawm theih a nih thu an tarlang.
NEDP nodal department - Planning department chuan NEDP hnuaia contract hna hrang hrangte chu a kaihhnawih department hnenah an pe chhuak ṭhin a, department-te'n an sem ṭhin. Tun dinhmunah chuan Planning department hian NEDP sum kawl an nei tawh lo a, a kaihhnawih department-ah sum an pe chhuak vek tawh a ni.