Transfer & posting fimkhur taka Kan kalpui a ngai - HTE Minister

Higher & Technical Education (HTE) minister Dr R Lalthangliana chuan, college lecturer tran­sfer leh posting chung­changah fimkhur taka kal a ṭul thu sawiin, "Politi­cal transfer an tih ṭhin hi a awm lo turah ka ngai," a ti.

HTE Minister hian nimin khan HTE depart­ment hotute leh college principal-te Secretariat conference hall-ah a kâwm a; lecturer transfer & posting rules mumal neih a ngai tih sawiin, "Hmun hla deuh zawk aṭanga chhuah dilna a tam thei hle. Sawn chhuah a ṭha em, an aiawh dah tur an awm em tihte ngaihtuah tel a ngai," a ti a, transfer & posting chu fimkhur taka kalpui a ngaih thu a sawi.

Lecturer-te transfer tum an nihin an college dinhmun hre chiang ber principal-te recommend a ngaih tawh tur thu sawiin Dr R Lalthangliana chuan, "Transfer & posting hi fimkhur taka kalpui ka tum. Political transfer an tih ṭhin angte hi a awm lo turah ka ngai," a ti.

HTE Minister chuan, college-a thuneitute chu infrastructure lama an mamawhte a hnena thehlut tura chahin, "Kum nga chhunga tihhlawhtlin theih tur in ngaih pawimawhte rawn thehlut rawh u. Vawi khata tihhlawhtlin vek theih a nih lo pawhin, zawi zawia tihhlawhtlin atan," a ti a; teaching facility-te chu mamawh anga kalpui a nih tur thu a sawi.

College campus-ah principal/faculty quarters awm se a duh thu sawiin Dr Thangtea chuan, "College uaptu an awm a ṭha ka ti. Aizawl angah chuan college-te'n ram kan nei mang lo a, a harsa ang. Hmun nei ṭha tak tak kan la awm a, campus chhunga quarters siam ngei hi ka duh. College hmunhma nei ṭhaah chuan an hun âwla campus chhunga infiam theihna tur siam a ṭha bawk ang," a ti.

Meeting kaihruaitu Biaktluanga sawi danin, Mizorama college hrang hrangah sanction post 743 a awm a, post 603 hnawhkhah niin, post hnawhkhah loh 140 a awm. Tun dinhmunah contract-in 93 leh part time-in mi 87 chhawr mek an ni. RUSA hnuaiah post 72 fill up mai tura tihfel tawh a ni.