CADC sorkar floor test-ah RM Chakma a dingchang

Nimin khan Chakma Autonomous District Council (CADC)-ah session-ah floor test neih a ni a, chief executive member (CEM) aṭanga paih tâk Shanti Jiban Chakma chuan sorkar siam zui zel turin thlâwptu a ngah tâwk tawh lo a, MNF Legislature Party leader Rasik Mohan Chakma chuan CEM ni turin thláwptu a ngah tâwk tih finfiah a ni.

CADC-a floor test nei tur hian Mizoram Governor chuan January 17, Ningani khan hriattirna a tichhuak a, Governor-in a ruat angin CADC session leh floor test chu Lawngtlai DC-in a kaihruai a ni. Floor test-ah hian CEM ṭhin Shanti Jiban Chakma, INC chuan thlâwptu  member pakhat chiah a nei a, Rashik Mohan Chakma, MNF chuan thlawptu 11 a nei thung.

Tarlan tawh ṭhin angin, CADC-ah hian member pasarih nei INC leh member panga nei BJP chuan April 2018-ah sorkar an siam a, mahse, Mizoramah MNF kaihhruai sorkar a pian hnuah INC member palite'n MNF an zawm. MNF chuan MDC 11 an nei ta a, member 20 awmna CADC-ah sorkar an siam thei ta a; CADC sorkara CEM Shanti Jiban Chakma leh Chairman-te pawh January 14-15 khan no confidence motion hmangin paih an lo ni tawh a ni.