MNF hna chu a tlo tur a ni - HM Cháma
Home minister Lalchamliana chuan, MNF party-in inthlanpuiah hnehna changa sorkarna an chan chhan chu kohhran mite ṭawngṭaina rah a nih thu sawiin, "MNF hna chu a tloin a rinawm tur a ni," a ti.
Nimina Mizo Hnam Rûna inkhawmah thu sawiin Lalchamliana chuan, "MNF sorkarin mipui beisei leh rin ang ngeia hna ṭha kan thawh hi minister, MLA leh worker-te mawh a ni. Sorkar hmasaah khan material supply-ah a sample ṭha tak an thehlut a, a aia chhia an supply ṭhin tihte a awm a, MNF sorkarah chuan a thiang ve lo, quaility ṭha ber supply pawhin hlawh chu a awm tho," a ti a; MNF sorkar hna reng reng chu a tloin a rinawm tur a ni tih a sawi a ni.
Lalchamliana chuan, tute emaw sorkar angin contract hna mi pahnih/pathum hnena hralh chhâwn ang chi chu MNF sorkarah a awm ve tur a ni lo tih sawiin, "Hausak thutte hi a hrisel lo a, a tlo lo bawk. Ramhnuaia zalenna suala lo kîrte leh martar chhungte hi ka vei em em a, Rehabilitation department changtu ka nih angin CM nen an mite chungchang kan la sawi dun ang," a ti.
Mizo mipuite chu remna leh muanna duhtu an ni tih sawiin Lalchamliana chuan, "Tun ṭum inthlan kha buaina lian tham awm loin kan zo thei a, Zoram mipui chungah te, MPF-te'n inthlanna thianghlim leh felfai kan neih theih nana an hmalaknaah khan lawmthu ka sawi a ni. Kohhranho pawhin ram an vei a, khawi maw laiah pulpit tlanga politics sawi awm mah se, inthlannaah 37% vel MNF-in kan chang kha kohhran mite ṭawngṭaina rah a ni," tiin a sawi.