State Referral Hospital Blood Bank hawng

State Referral Hos­pital, Falkawna blood bank din thar chu nimin khan Mizoram Institute of Medical Education and Research (MIMER) director Prof. L Fimate-in a hawng a, mi eng emaw zatin thisen an pe nghal.

State Referral Hos­pital blood bank hi August 3, 2015 aṭangin thisen dah khawlna (blood storage) atan hman ṭan a ni a, blood bank puitling ni tura ruahman nghal niin, August 29, 2018-ah CDSCO-in an endik a, September 4, 2018-ah phalna pek niin, phalna pek chu September 2023 thleng atan a ni ang.

MIMER director Prof. L Fimate chuan, Mi­zoramah thisen pek (blood transfusion) chu kum 1973-ah Aizawl Civil Hospital-ah kalpui ṭan a nih thu sawiin, State Referral Hospital/MIMER-in blood bank a nei ve ta chu Mizoram mamawh leh Mizoram tana méllung pawimawh tak a nih thu a sawi bawk.

Blood bank hawnna inkhawm chu State Re­ferral Hospital medical superintendent Dr Lal­hmuchhuaka'n a kaihruai a, blood bank officer Dr ST Lalhriatpuii'n blood bank din chhoh dan a sawifiah.

State Referral Hospital blood bank-ah hian thisen pe hmasa ber nih duh an awm nual avangin, thisen pe pe hmasa ber tur ṭhum vâwr a ni a, Dr C Laldinthari, Dermatology department chuan thisen a pe hmasa ber a, thawktu dang eng emaw zatin an pe zui bawk.

State Referral Hospital blood bank-ah hian thisen unit 600 dah khawl theih a ni a; blood bank officer pakhat bakah thawktu dang panga an awm a, thisen pekna khum pali a awm a ni.